Բաքուն Հայաստանի հետ խաղաղության պայմանագրի շուրջ առաջարկների երրորդ փաթեթն է փոխանցել Երևանին և ակնկալում է մինչև այս տարեվերջ այս հարցով ևս մեկ հանդիպում անցկացնել, Մոսկվայում հայտարարել է Ադրբեջանի արգործնախարարը ռուս գործընկերոջ հետ բանակցություններից հետո։ Թե երբ է նախատեսվում հանդիպումը, ում միջև և ինչ դրույթներ են ներառված Ադրբեջանի նոր առաջարկներում, Բայրամովը չի հստակեցրել, միայն ընդհանոր գծերով հայտնել է, թե մինչ այդ հայկական կողմի ներկայացրած առաջարկները Բաքվի համար ընդունելի չեն եղել։
«Եթե չխորանանք մանրամասների մեջ, դրա փիլիսոփայությամբ մեր առաջարկած պարզ սկզբունքները վերածվում էին շրջանակային համաձայնագրի, որն իր հերթին պետք է ներառեր մի շարք այլ պայմանագրեր։ Մենք կարծում ենք, որ սկզբունքը, ըստ որի քանի դեռ ամեն ինչ համաձայնեցված չէ, ոչինչ համաձայեցված չէ, կարող է և լավ է հնչում։ Բայց կարճ ժամկետում համաձայնեցնել հայ-ադրբեջանական տարաձայնությունների ողջ փաթեթը՝ քիչ հավանական է թվում։ Ուստի, որպեզի ինչ-որ հիմք ունենանք առաջ շարժվելու համար, ադրբեջանական կողմի մոտեցումը առավել իրատեսական է», – ասել է նա։
Գլոբալիզացիայի և տարածաշրջանային համագործակցության վերլուծական կենտրոնի նախագահ, քաղաքագետ Ստեփան Գրիգորյանն «Առաջին լրատվական»-ի հետ զրույցում կարծիք հայտնեց, որ Ադրբեջանն իր բոլոր քայլերը համաձայնեցնում է Ռուսաստանի հետ. «Ասեմ ավելին՝ ես չեմ համարում, որ հիմա Ռուսաստանը դասական միջնորդ է։ Ռուսաստանի շահերը համընկնում են Ադրբեջանի շահերի հետ ու իրենք համաձայնեցնում են բոլոր քայլերը։ Վերջին շրջանում Ադրբեջանի կողմից արված բոլոր քայլերը՝ այդ թվում Լաչինի միջանցքը փակելու փորձերը, «բնապահպանական պահանջները» համաձայնեցված էին Ռուսաստանի հետ։ Եթե համաձայնեցված չլինեին, ռուս խաղաղապահները համապատասխան հայտարարություններ արած կլինեին»,-նշեց նա։
Ըստ Գրիգորյանի՝ այդ իմաստով պետք է արձանագրել, որ Ռուսաստանի դիրքորոշումն այսօր միջնորդի դիրքորոշում չէ. «Իրավիճակն այնպիսին է, որ մի կողմում Հայաստանն է, մյուսում՝ Ադրբեջանն ու Ռուսաստանը»։
Մեր զրուցակիցը համարում է, որ անկախ նրանից, թե որերորդ փաթեթը կներկայացնի Ադրբեջանը, դրա էությունը չի փոխվում. «Իրենք կարող են տասնյակ առաջարկներ ներկայացնել, բայց դրանք ավելի շատ ոչ թե առաջարկներ են, այլ վերջնագրեր։ Վերջնագրեր, որ մենք պետք է Մեղրիով միջանցք տանք, իրենք ասում են «Զանգեզուրի միջանցք», վերջնագրեր, որ մենք անկլավներ տանք։ Ես համոզված եմ, որ իրենց երրորդ փաթեթը կրկնությունն է այն բոլոր պահանջների, որոնք իրենք մեր առջև դնում են։ Օրինակ՝ «Զանգեզուրի միջանցք», դա էքստերիտորիալ միջանցք է, որ իրենք առանց ՀՀ պետական մարմինների վերահսկողության, կարողանան անցնել Մեղրիով։ Պարզ է նաև, որ նպատակ ունեն Տավուշի մարզի այսպես կոչված անկլավները վերցնեն։ Երբ նայում ես իրավական հիմքերը՝ ոչ մի անկլավ չկա, բայց Ադրբեջանը օգտվում է այն հանգամանքից, որ Սովետական միության ժամանակ ինչ-որ հարցեր կային ու հիմա եկել պահանջներ է ներկայացնում։ Իրենք վերջնագրեր են ներկայացնում, որին Հայաստանը փորձում է դիմադրել»,-եզրափակեց նա։
Ընդգծենք նաև, որ Ռուսաստանում Ադրբեջանի արտգործնախարարը շնորհակալություն է հայտնել բոլոր կողմերին՝ Հայաստանի հետ հարաբերությունների կարգավորմանն աջակցելու համար։ Միաժամանակ ընդգծել է, որ բոլորի համար ակնհայտ է, որ Բաքուն իր օրակարգն ունի, հետևողական է իր դիրքորոշման մեջ և կշարունակի նույն ոգով առաջ շարժվել։
