ԱՄՆ-ն շարունակում է Կոնգրեսի և Սենատի նոյեմբերի 8-ին կայացած միջանկյալ ընտրության արդյունքի հաշվարկը: Հաշվարկի արդյունքում որոշակի առաջատարություն ունեն հանրապետականները, բայց այդ հաշվարկը գոնե առայժմ թույլ չի տալիս խոսել այն մասին, թե ի վերջո ով կտնօրինի Ներկայացուցիչների պալատը, իսկ ով՝ Սենատը: Հավանական է դիտվում, որ հանրապետականները այդուհանդերձ կկարողանան վերցնել Ներկայացուցիչների պալատը, թեև ոչ մեծ առավելությամբ, իսկ ահա Սենատում դեմոկրատական կուսակցությունը կկարողանա պահպանել իր նվազագույն մեծամասնությունը:
Կոնգրեսի 435 տեղերից մեծամասնության համար անհրաժեշտ է 218 տեղ: Ներկայացուցիչների պալատի համար միջանկյալ ընտրությունն ամբողջական է, իսկ Սենատի պարագայում քվեարկվում է տեղերի 1/3-ը: Այսինքն 100 տեղից միայն 35-ի համար, քանի որ սենատորներն ընտրվում են վեց տարի ժամկետով և միջանկյալ ընտրություններին այսպես ասած «թափուր» տեղերը չեն գերազանցում 1/3-ը: Մինչ ընտրությունը, Սենատում պատկերը հավասար էր՝ 50/50, սակայն դա դեմոկրատներին տալիս էր առավելություն, քանի որ անհրաժեշտության դեպքում քվեարկում է նաև փոխնախագահը, իսկ քանի որ ԱՄՆ կառավարող վարչակազմը դեմոկրատական է, ապա փոխնախագահ Կամալա Հարիսի ձայնը ըստ էության հօգուտ դեմոկրատների է: Ինչ կփոխվի ձայների հետագա հաշվարկի արդյունքում, կերևա ժամերի, իսկ գուցե նույնիսկ օրերի ընթացքում, սակայն ընդհանուր միջանկյալ ընտրության պատկերը տևական ժամանակ՝ սկսած նախընտրական շրջանից հուշում է ներամերիկյան իրականության քաղաքական գրեթե աննախադեպ բևեռացվածության մասին:
Ընտրություն, որը զգալի առումով դիտարկվում է նաև որպես նախագահի 2024 թվականի ընտրության նախերգանք-մեկնարկ: Ընդ որում, միջանկյալ ընտրության քվեարկությանը հաջորդող էքզիտ-փոլերի պատասխաններից պարզ է դարձել, որ քվեարկողների 54 տոկողը հավանության չի արժանացնում նախագահ Բայդենի գործունեությունն ու դեմ է նրա վերընտրությանը: ԱՄՆ նախագահ Բայդենը, որ մեկնում է Եգիպտոս, հետո Կամբոջա և այնուհետեվ Ինդոնեզիա՝ մի քանի Վեհաժողովնների մասնակցելու, այդ թվում Մեծ Քսանի Վեհաժողովին ինդոնեզական Բալիում, հայտարարել է, որ պատրաստ է աշխատել Կոնգրեսում ընտրված բոլոր դեմոկրատների ու հանրապետականների հետ: Այդ ֆոնին, առաջիկա օրերին իր՝ նախագահի թեկնածու առաջադրվելու մասին կարող է հայտարարել նախկին նախագահ Դոնալդ Թրամփը, ինչը նշանակելու է ԱՄՆ ներքաղաքական իրավիճակի էլ ավելի սրացում: Մյուս կողմից, միջանկյալ ընտրության առաջին արդյունքներից հետո հանրապետական կուսակցությանը լոյալ մեդիայում, մասնավորապես օրինակ Ֆոքս Նյուզում հրապարակումներ եղան, որոնց հեղինակները նրբորեն թիրախավորում են Թրամի հավակնությունը, հորդորելով նրան չհայտարարել իր թեկնածության առաջադրման մասին այլ ճանապարհ տալ երիտասարդներին, մասնավորապես Ֆլորիդայի նահանգապետի ընտրությանը մեծ առավելությամբ հաղթած 44-ամյա Ռոն Դոնատիսին, որը դիտարկվում է նախագահի ընտրությանը հանրապետական ֆավորիտ թեկնածուի իրական հավակնորդ:
Այս իրադարձությունները Հայաստանից բնականաբար պահանջում են ոչ միայն մեծ ուշադրություն, այլ նաև աշխատանք: Հասկանալի է, ամենևին ոչ ներքաղաքական իրողությունների վրա ազդելու համար, այլ դրանց այս կամ այն դասավորությանն ու ընթացքին պատրաստ լինելու: Հայաստանը, նաև ամերիկահայ լոբբին ավանդաբար արդյունավետ հարաբերություն ու աշխատանք կառուցել է դեմոկրատների հետ, մի շարք պատճառներով: Եթե Նահանգներում Կոնգրեսի Ներկայացուցիչների պալատի վերահսկողությունն անցնում է հանրապետականներին և այդ կերպ նկատելիորեն ավելի ուրվագծում նրանց մրցունակության բարձրացումը 2024-ի նախագահի ընտրությանն ընդառաջ, ապա անկասկած է, որ Հայաստանին և ամերիկահայ կազմակերպություններին անհրաժեշտ է ձևավորել հանրապետականների հետ աշխատանքի արդյունավետությունը բարձրացնելու նախադրյալ և միջավայր, ինչը հատկապես կարևոր է այն անորոշության և անկանխատեսելիության պայմաններում, որ կա միջազգային ասպարեզում: Միևնույն ժամանակ, ընդհանրապես, հաշվի առնելով ամերիկյան ներքաղաքական պատկերի նկատելի բևեռացվածությունը, անկախ հանգամանքից, թե որն է Կոնգրեսի պալատների վերահսկող մեծամասնություն, Հայաստանը և հայկական կազմակերպությունները թերևս պետք է նոր իրավիճակում լրջորեն մտորեն երկու բևեռների հետ հարաբերության արդյունավետության բարձրացման և այդ ուղղությամբ քայլերի մշակման մասին:
