Այսօր Մեծ Բրիտանիայի արքայադուստր Դիանայի կամ ինչպես նրան շատերը կոչում էին՝ Լեդի Դիի մահվան 14-րդ տարելիցն է: 1997 թ. այս օրը աշխարհում բարությամբ, բարեգործությամբ և գթասրտությամբ մեծ համբավ ձեռք բերած արքայադուստր Դիանան իր ընկերոջ՝ Դոդի Ալ-Ֆայեդի և վարորդ Անրի Պոլի հետ վթարի ենթարկվեցին Փարիզի Ալմա կամրջի առաջ՝ թունելում, որի հետևանքով Դիանան և Դոդին մահացան: Մահացավ նաև նրանց վարորդը, իսկ կենդանի մնացած թիկնապահ Թրևոր Րիս Ջոնսը, ուշքի գալով, հայտարարեց, որ չի հիշում կատարվածը:
Հետագայում բրիտանական պետական քննությունը հայտարարեց, որ վարորդի արյան մեջ ալկոհոլի հետքեր են հայտնաբերվել: Սակայն շատերը չեն հավատում դրան, և մի շարք առեղծվածային վարկածներ են առաջ քաշում:
Դրանից ամենատարածվածն այն է, որ թագավորական ընտանիքը դժգոհ է եղել, որ արքայազն Չարլզի նախկին կինը կարող է ամուսնանալ մեկ այլ մարդու` դավանանքով մուսուլման, արաբ միլիարդատեր Դոդի Ալ-Ֆայեդի հետ: Սակայն բոլոր այս վարկածները փաստաթղթային ապացույց այդպես էլ չեն ստացել:
