Oգոստոսի 1-30-ը իսլամական աշխարհը նշում էր Ռամադանը, որն իսլամական լուսնային օրացույցի 9-րդ՝ սրբազան ամիսն է: Ռամադանը շարժական ամիս է և տևում է 29-30 օր: Այս ընթացքում հավատացյալ մուսուլմանները ծոմ են պահում:
Երեկ Երևանի Կապույտ մզկիթում իրանցի մուսուլմանները հանդիսավորությամբ, աղոթքով ու տոնախմբությամբ նշեցին իրենց սրբազան տոնի ավարտը՝ Ֆիտրը: Հացկերույթն սկսվեց մայրամուտից հետո՝ երեկոյան ժ. 21:00-ի սահմաններում: Այս ընթացքում մուսուլմանները մզկիթում աղոթքից հետո միասին նստեցին՝ ընթրելու գորգերին փռված սեղանի շուրջը՝ տղամարդիկ առանձին, կանայք ու երեխաները՝ առանձին:
«Այս մեկ ամիսը մեր պասի օրերն են եղել: Ժողովուրդը պաս է պահում լուսաբացից մինչև երեկո: Մինչև մութն ընկնելը ոչինչ չեն ուտում ու խմում, բայց այստեղ կարևորը դա չէ: Չուտելով կամ չխմելով չի որոշվում Ռամադանը»,- «Առաջին լրատվական»-ի հետ զրույցում ասաց Երևանի Կապույտ մզկիթի համակարգող Ռահմանե Բեհրուզին՝ մեկնաբանելով Ռամադանի խորհուրդն ու տոնակատարության ավարտն ազդարարող Ֆիտրը:
Նրա խոսքով՝ պասի վերջին օրերին՝ երկնքում լուսնի երևալուն պես, մուսուլմանական աշխարհում սկսվում է տոնը՝ Իդ Ալ-Ֆիտրը: «Այդ օրն ամեն մարդ օրվա իր կերած բրնձի, հացի կամ այլ սննդի՝ 3 կիլոգրամին համարժեք գումարը տրամադրում է կարիքավորներին: Այդ օրն առավոտյան ժ. 8:00-8:30-ի սահմաններում բոլորը հավաքվում, աղոթք են անում ու դուրս գալիս մեկ ամսվա պասից: Նամազից հետո մոլլան ու հավատացյալները միասին նախաճաշում են»,- նշեց նա:
Նա տեղեկացրեց նաև, որ Կապույտ մզկիթում Ռամադանի ամբողջ ընթացքում, Հայաստանում Իրանի դեսպանության, մշակույթի կենտրոնի ու բարեգործական կազմակերպությունների աջակցությամբ, հավատացալների համար ամեն երեկո հացկերույթ է կազմակերպվել՝ թեկուզ հաց, խուրմա, պանիր կամ բրնձով որևէ ուտեստ:
«Ռամադանին պետք է հարամ բան չանես: Եթե կոչվում ես լավ մարդ, վատ բան չպետք է անես: Ռամադանի խորհուրդն այն է, որ կարծես խերն ու բարաքյաթն այս մի ամսվա մեջ լինի: Ամեն մարդ ինչքան լավություն անում է, կարծես Աստծուց ստանում է: Մարդիկ ինքնամաքրվում են»,- նկատեց նա՝ հավելելով, որ վերջին օրը մարդիկ արդեն հանգիստ խղճով կարող են նստել, ուտել-խմել և ուրախանալ:
Կապույտ մզկիթում տոնական տրամադրությունը շարունակվեց մինչ ուշ գիշեր:
