Հարձակումը Հայաստանի վրա Ադրբեջանի պատասխանն է միջազգային հանրության միջնորդական ջանքերին: Այս մասին ՄԱԿ-ի Անվտանգության խորհրդի հրատապ նիստում հայտարարեց ՄԱԿ-ում ՀՀ մշտական ներկայացուցիչ Մհեր Մարգարյանը:
Մարգարյանը հիշեցրեց, որ Հայաստանն անցած տարվա ընթացքում ՄԱԿ-ի Անվտանգության խորհրդի ուշադրությունն է հրավիրել, որ Ադրբեջանը բռնի ուժով տարածքներ ձեռք բերելու անօրինական վարքագծի մեջ է:
«2021 թվականի մայիսի 14-ի, հուլիսի 29-ի և նոյեմբերի 16-ի նամակների միջոցով Հայաստանը խորհրդի անդամներին ահազանգել է Ադրբեջանի կողմից միջազգային իրավունքի նորմերի և սկզբունքների, ինչպես նաև 2020 թվականի նոյեմբերի 9-ի եռակողմ հայտարարության դրույթների խախտումների մասին: Վերջին հարձակումները ցույց են տալիս, որ պատշաճ հաշվետվողականության միջոցառումների բացակայության պարագայում ագրեսիայի քաղաքականությունը, հավանական է, որ կշարունակվի և նույնիսկ կմեծանա իր մասշտաբով»,-շեշտեց Հայաստանի ներկայացուցիչը:
Նա նաև ընդգծեց, որ նախկինում ուժի կիրառման արդյունքներով ոգևորված՝ Ադրբեջանն այժմ ձգտում է արդարացնել բռնությունը, ագրեսիան՝ ուժով տարածքներ գրավելու համար: Մարգարյանը ՄԱԿ-ի ԱԽ նիստի ներկաներին հիշեցրեց, որ Ադրբեջանի այս հարձակումը հաջորդում է 2021 թվականի մայիսին և նոյեմբերին տեղի ունեցած հարձակումներին, երբ Ադրբեջանը գրավեց Հայաստանի ինքնիշխան տարածքի շուրջ 45 քառակուսի կմ տարածք։
Հայաստանի ներկայացուցիչն ընդգծեց նաև, որ ագրեսիայի այս գործողութունը տեղի է ունեցել տարբեր հարթակներում անցկացվող խաղաղ բանակցությունների համատեքստում, որոնց նպաստել են տարբեր դերակատարներ: Եվ Հայաստանն այդ բոլոր գործընթացներին բարեխղճորեն մասնակցել է՝ նպատակ ունենալով կայունացնել իրավիճակը Հարավային Կովկասում։ «Հայաստանը հրապարակայնորեն պարտավորվել է աշխատել տարածաշրջանում խաղաաղության հաստատման ուղղութայամբ և արտահայտել է իր պատրաստակամությունը՝ խաղաղության համաձայնագրի շուրջ սկսելու մասնակցությունները։ Այս ագրեսիան Ադրբեջանի պատասխանն է միջազգային հանրության միջնորդական ջանքերին»,-շեշտեց Մարգարյանը:
Սեպտեմբերի 13-ին ժամը 00:05-ից Ադրբեջանի ԶՈՒ ստորաբաժանումները Գորիսի, Սոթքի և Ջերմուկի ուղղությամբ հրետանային միջոցներից, խոշոր տրամաչափի հրաձգային զինատեսակներից սկսել են ինտենսիվ կրակ վարել հայկական դիրքերի ուղղությամբ: Հակառակորդը կիրառում էր նաև ԱԹՍ-ներ: Ավելի ուշ Ադրբեջանը հրետանային միջոցներ էր կիրառել նաև այլ ուղղություններով: Հայկական կողմի զոհերի թիվն այս պահի պաշտոնական տվյալներով 105 է: Վիրավորում ստացած 6 քաղաքացիական անձանցից 4-ը շարունակում են բուժումը հիվանդանոցներում: Հայաստանի անվտանգության խորհրդի քարտուղար Արմեն Գրիգորյանը սեպտեմբերի 14-ին հայտնել էր, որ միջազգային հանրության ներգրավվածության շնորհիվ հաջողվել է ձեռք բերել հրադադարի պայմանավորվածություն։
