«Ինձ համար մեծագույն պատիվ ու հաճույք է խնդրել ձեզ դիմավորել Տավուշի թեմի մանկապատանեկան երգչախմբին»:
Հենց այսպես` լեգենդար Queen խմբի կիթառահար Բրայան Մեյի ոգեշնչող խոսքերով ու հանդիսատեսի բուռն ծափահարություններով, սեպտեմբերի 7-ին մեկնարկեց գիտության և արվեստի «STARMUS VI» փառատոնի Another World խորագրով համերգի ամենատպավորիչ ելույթը:
Անմոռանալի հույզերի, փայլուն երաժշտական կատարման ու ֆանտաստիկ էներգիայի աղբյուրը Տավուշի թեմի մանկապատանեկան երգչախմբի երեխաներն էին, որոնց երևանյան ելույթը հնարավոր էր դարձել «Ամերիաբանկի» աջակցությամբ:
Երաժշտությունն իրենց ներսում կրելով` տավուշցի տաղանդավոր փոքրիկները հիացրին բոլորին ու վարակեցին իրենց դրական լիցքերով:
Դեռ ամիսներ առաջ նրանց կատարումը դուրս եկավ Տավուշի սահմաններից, այնուհետև հատեց նաև Հայաստանի սահմանն ու արդյունքում «պայթեցրեց» համալիրի բեմը` հարյուրավոր հանդիսատեսի առաջ: ՄՀՀ բեմում կանգնած երեխաների աչքերում ուրախություն էր, հանդիսատեսի սրտում` հիացմունք: