Իսպանիայի առաջնության երկրորդ տուրի կենտրոնական խաղում «Բարսելոնա»-ն 5 անպատասխան գնդակ ուղարկեց Չեմպիոնների լիգայի մասնակից «Վիլյառեալ»-ի դարպասը:
Թվում էր՝ կատալոնացիների համար հեշտ չի լինի մոտենալ մեկ օր առաջ գլխավոր մրցակից «Ռեալ»-ի ցուցադրած արդյունքին. «Արքայական» ակումբը 6:0 հաշվով պարտության մատնեց «Սարագոսա»-ին: «Վիլյառեալ»-ն ամենևին էլ «Սարագոսա» չէ. միակ թիմն է, որ անցյալ մրցաշրջանում խոշոր հաշվով չի պարտվել «Բարսա»-ին, և Պեպ Գվարդիոլան որոշել էր երկրորդ կազմով պայքարել նրա դեմ:
«Բարսելոնա»-ն հանդիպումը սկսեց երեք պաշտպանով, որոնցից միայն Աբիդալն է նոմինալ պաշտպան, նրան օգնում էին Բուսկետսն ու Մասկերանոն: Կիսապաշտպանությունում խաղում էին Ֆաբրեգասը, Կեյտան, Ալկանտարան և Ինիեստան: Հարձակման գծում Վիլյայի փոխարեն խաղադաշտում էր Ալեքսիս Սանչեսը:
Այդուհանդերձ, միայն խաղավերջում գրանցված վիճակագրական տվյալները բավական են հասկանալու համար, որ միմյանց դեմ պայքարում էին բոլորովին տարբեր մակարդակի թիմեր. անկյունային հարվածներ՝ 12:1, հարվածներ դարպասին՝ 17:3, գնդակի տիրապետում՝ 70:30 (տոկոս)՝ բնականաբար, բոլոր ցուցանիշները կատալոնացիների օգտին էին:
«Բարսելոնա»-ն առաջին րոպեից մինչև մրցավարի եզրափակիչ սուլիչը գերազանցեց մրցակցին: «Վիլյառեալ»-ն ամբողջ հանդիպման ընթացքում միայն մեկ հնարավորություն ուներ գոլ խփելու. Ռոսսիի հարվածից հետո գնդակը ետ մղվեց հորիզոնական դարպասաձողից: Իսկ Գվարդիոլայի սաներն ինչպես հարկն է՝ օգտագործեցին իրենց առավելությունը: Գոլերի հեղինակներ դարձան Ալկանտարան (25 ր.), Ֆաբրեգասը (45 ր.), Սանչեսն (47 ր.) ու Մեսսին (52, 74 ր.): Նշենք, որ Ալեքսիս Սանչեսն կատալոնական ակումբի կազմում խփեց իր առաջին գոլը:
