Սեպտեմբերի 3-ին ՌԴ նախագահ Պուտինը հեռախոսազրույց է ունեցել Բաքվի ղեկավար Իլհամ Ալիևի հետ: Ըստ Կրեմլի հաղորդագրության, քննարկվել են հայ-ադրբեջանական սահմանի անվտանգության և կայունության ապահովմանն առնչվող հարցեր, հիշատակվել է 2020 թվականի նոյեմբերի 9-ի, 2021 թվականի հունվարի 11-ի և նոյեմբերի 26-ի եռակողմ հայտարարությունների կատարման կարևորությունը: Կարևոր է մի հատկանշական ձևակերպում, որ տեղ է գտել Կրեմլի հաղորդագրության մեջ: Իլհամ Ալիևը իրազեկել է Պուտինին օգոստոսի 31-ին Բրյուսելում տեղի ունեցած Փաշինյան-Միշել-Ալիև հանդիպման վերաբերյալ:
Բրյուսելի հանդիպումից առաջ Պուտինը խոսել էր Նիկոլ Փաշինյանի հետ՝ օգոստոսի 31-ին: Ընդ որում, ուշագրավ է, որ վերջին ամսվա ընթացքում Պուտինը Փաշինյանի հետ խոսել է չորս անգամ՝ օգոստոսի 2-ին, 8-ին, 24-ին և 29-ին, այն դեպքում, երբ Ալիևի հետ խոսում է սեպտեմբերի 3-ին: Հեռախոսազրույցների այդ 4:1 հարաբերակցությունը կամ հաշիվը անշուշտ միարժեք չէ և բարդ է ասել, թե ինչի մասին է խոսում այն, սակայն հատկանշական է, որ Բրյուսելի հանդիպման վերաբերյալ Պուտինին գոնե առաջինը «իրազեկում» է Ալիևը:
Մեծ հավանականությամբ, առաջիկայում կլինի նաև Փաշինյան-Պուտին շփում, որի ընթացքում թերևս «իրազեկման» իր տարբերակը կներկայացնի Հայաստանի վարչապետը: Մինչ այդ, սեպտեմբերի 5-ին Մոսկվա է մեկնում Հայաստանի արտաքին գործերի նախարար Միրզոյանը, որը ՌԴ մայրաքաղաքում կհանդիպի իր ռուս գործընկերոջ՝ Լավրովի հետ: Ըստ ամենայնի, բրյուսելյան հանդիպումից հետո Մոսկվան ձեռնամուխ է լինում որոշակի աշխուժության, ինչը կամ Բրյուսելը հակակշռելու համար է, կամ ունի որոշակի «կապակցվածություն» և այդ իմաստով Եվրոպայի ղեկավարությունն ու Ռուսաստանը գործում են որոշակի լռելյայն համադրվածությամբ, փորձելով գուցե ուկրաինական «հողի վրա սուր բախման պարագայում առաջիկա ձմեռային ճգնաժամին ընդառաջ որոշակի մեղմացում ապահովել «կովկասյան հողի» վրա: Իհարկե շատ բարդ է այդ առումով ստույգ նախանշել՝ Մոսկվայի հետ բրյուսելյան նկատելի աշխուժացումը հատկապես ո՞ր տարբերակն է, հակադրմա՞ն, թե համադարման, սակայն ակնառու է նաև, որ ռեգիոնալ օրակարգում շարոււնակվում է բավականին ընդգրկուն և բազմազան «մաքոքային» պտույտները, եթե հաշվի առնենք, որ Բրյուսելի հանդիպմանը զուգահեռ նույն օրը Իրանի և ՌԴ արտգործնախարարների հանդիպում էր Մոսկվայում, իսկ Պուտին-Ալիև հեռախոսազրույցից առաջ էլ ՌԴ նախագահ Պուտինը նույն օրը հեռախոսազրույց էր ունեցել Թուրքիայի նախագահ Էրդողանի հետ: Անկասկած է, որ այդ ամենն ընդգրկող շրջանակը ռեգիոնալ հաղորդուղիների օրակարգն է:
