Փետրվարի 7-ին Ավտոապահովագրողների բյուրոն որոշում կայացրեց վերանայել ԱՊՊԱ–ի արժեքը, ինչի արդյունքում բարձրացան բազային սակագները, ինչպես նաև փոփոխություններ կատարվեցին ապահովագրության արժեքի հաշվարկման համակարգում: Արդյունքում ապահովագրական ընկերությունները 2022 թվականի առաջին կիսամյակում մոտ 2.3 մլրդ դրամի զուտ շահույթ են գրանցել։ Համեմատության համար նշենք, որ նախորդ տարի նույն ժամանակահատվածում ընդհանուր առմամբ ընկերությունները 131 մլն դրամի վնաս էր կրել։
Այս առնչությամբ, տնտեսագետ Կարեն Սարգսյանն «Առաջին լրատվական»-ի հետ զրույցում նշեց, որ առհասարակ ապահովագրական ընկերությունների գործունեությունը ժամանակի ընթացքում կարող է ինչ-որ փուլում դրական արդյունքներ գրանցել, ինչ-որ փուլում՝ բացասական. «Ապահովագրական ընկերության գործառույթն այն է, որ հավաքագրի ապահովագրական վճարներ և դեպքերի ի հայտ գալու դեպքում հատուցումներ իրականացնի: Քանի որ մենք որևէ կերպ չենք կարող պլանավորել, թե հատուցումները հատկապես որ ժամանակահատվածում շատ կլինեն, պահի տակ լինում են դեպքեր, երբ ասենք, այդ ժամանակահատվածում հատուցումները լինում են ավելի շատ, քան ստացված մուծումները, և բնականաբար, արդյունքը լինում է բացասական: Իսկ, ասենք, որոշ ժամանակահատվածներում լինում է հակառակ պրոցեսը, այսինքն ընկերությունն ավելի շատ ապահովագրական մուծումներ է ստացել, քան հատուցումներ իրականացրել: Ժամանակի ընթացքում այսպիսի վայրիվերումներ լինում են ու սա նորմալ է:
Պարզապես, երկարաժամկետ հատվածում ապահովագրական ընկերության ստացած վճարները, բնականաբար, ավելի շատ պետք է լինեն, քան իր կատարած հատուցումները, այլապես որևէ մեկը ապահովագրական գործունեությունը չի իրականացնի, սակայն սա չի նշանակում, որ պահի տակ ապահովագրական ընկերությունը չի կարող բացասական արդյունք ցուցաբերել»,-ասաց նա:
Կարեն Սարգսյանը նաև նկատեց, որ շահույթի աճը պայմանավորված է նաև հաճախորդներից հավաքագրվող գումարների աճով, քանի որ բավականին փոփոխություններ եղան ԱՊՊԱ համակարգում. «Իհարկե, ապահովագրական վճարների աճը դեր խաղաց: Եթե համեմատենք անցած տարվա հետ, այս տարի ԱՊՊԱ-ի ոլորտում համակարգը փոխվել է, այդ թվում մուծումների չափը: Սա հավելյալ եկամուտ է ապահովել ապահովագրական ընկերություններին:
Այս ընթացքում փաստացի դեպքերն ավելի քիչ են տեղի ունեցել, և ստացված հասույթները հավաքվել են, կամ տեղի ունեցած դեպքերով քիչ ծավալի վնասներ են հատուցվել, որի արդյունքում իրենց շահութաբերությունն աճել է»,-ընդգծեց տնտեսագետը: