Երևանի Արաբկիր վարչական շրջանում շարունակվում է ՀՀ գյուղատնտեսության նախարարության նախաձեռնությամբ օգոստոսի 21-ից բացված գյուղատնտեսական մթերքների տոնավաճառը, որն այս անգամ ներառել է հանգստյան երկու օրերն էլ։ Այս մասին ասվում է ՀՀ գյուղատնտեսության նախարարության պաշտոնական կայքում:
Շաբաթ և կիրակի օրերին շուկայի ընթացքին հետևել ու գնումներ է կատարել նաև գյուղատնտեսության նախարար Սերգո Կարապետյանը, ում, ի թիվս ոլորտի մի շարք մասնագետների, ուղեկցել է նաև FAO-ի փորձագետ Մարթոն Սաբոն: Վերջինը գոհունակությամբ ընդգծել է, որ գյուղատնտեսական շուկայի առաջին փորձը հաջողությամբ է ներդրվել և պատրաստակամություն է հայտնել աջակցել շուկայի կայացմանը: Օգոստոսի 27-ին և 28-ին անցկացված տոնավաճառն աչքի է ընկել իր կազմակերպվածությամբ:
Մասնակից գյուղացիական տնտեսությունների թիվը անցել է 400-ից: Բացի առանձին անհատներից` շուկայում իրենց ապրանքատեսականին են ներկայացրել նաև կոոպերատիվներն ու գիտական կենտրոնները: Ըստ ներկայացված տեղեկատվության՝ երկու օրվա ընթացքում վաճառվել է 145 տոննա պտուղ-բանջարեղեն: Կազմակերպիչները վերահսկողություն են սահմանել, որպեսզի վերավաճառողների մուտքն արգելվի: Երկու նման փորձ է նկատվել, սակայն հաջողվել է այդ դեպքերը հենց տեղում կանխել:
Հիշեցնենք, որ տոնավաճառի մասնակիցներին կազմակերպիչների կողմից անվճար տրամադրվել են հարմարավետ տաղավարներ, վրաններ, կշեռքներ, սայլակներ և արտահագուստ՝ ապահովելով քաղաքակիրթ առևտրի համար անհրաժեշտ պայմաններ:
Ինչպես գյուղացիների ու գնորդների հետ զրույցում վստահեցրել է նախարար Սերգո Կարապետյանը, գյուղատնտեսական այս շուկայում աստիճանաբար ամեն ինչ կընկնի իր տեղը, քանի որ գյուղատնտեսության նախարարությունում պատրաստակամ են հաշվի առնել բոլոր առաջարկներն ու երբեմն առաջացող մտահոգությունները:
