Աբովյան-Կորյուն փողոցների խաչմերուկի գետնանցման կրպակատերերը, ինչպես արդեն տեղեկացրել էինք, Երևանի քաղաքապետարանից ստացել էին հաղորդագրություն, որով տեղեկացվում էր, թե այդ կրպակների տարածքը հանվել է աճուրդի: Այս որոշումը բարկացրել է կրպակատերերին, ովքեր արդեն տարիներ շարունակ վարձակալել են գույքը և այս տարվա սկզբին 22 միլոն դրամ են ծախսել կրպակները վերանորոգելու համար:
Կրպակատերերը նամակներով դիմել են նախագահին, մարդու իրավունքների պաշտպանին, քաղաքապետին, սակայն ոչինչ փոխել չի հաջողվել, և աճուրդը կկայանա սեպտեմբերի 29-ին։ Ի դեպ, գույքի վաճառքի համար առաջարկվող նվազագույն գինը սահմանվել է 98,500,000 դրամ, բացի այդ՝ հաղթողը պետք է պարտավորություն ստանձնի՝ կատարել առնվազն 225,500,000 դրամի ներդրում։
Այսօր կրպակատերերից մեկը «Առաջին լրատվական»-ին հայտնեց, որ իրենք՝ անցման տակի բոլոր կրպակատերերը, միացել են և ստեղծել մի ԲԲԸ, և այժմ խնդրում են, որ գոնե աճուրդ չանցկացվի, այլ տարածքը վաճառեն հենց իրենց՝ այժմյան օգտագործողներին: Կրպակատերերը կարծում են, որ աճուրդի նպատակը գետնանցման գույքը ինչ-որ մեկի սեփականությունը դարձնելն է, ուստի այդ մեկը կարող է աճուրդում ավելի շատ գումար առաջարկել, քան ի վիճակին են վճարել կրպակատերերը, և արդյունքում շահել:
Վաղն առավոտյան Աբովյան-Կորյուն փողոցների խաչմերուկի գետնանցման կրպակատերերը իրենց ընտանիքներով բողոքի ակցիա են անցկացնելու նախագահական նստավայրի մոտ:
