WikiLeaks-ը հրապարակել է ամերիկյան դիվանագիտական գաղտնի նամակագրության մի փաստաթուղթ, որը վերաբերում է 2009 թ. Երևանի քաղաքապետի ընտրություններին, ինչպես նաև ընտրություններին ներկայացված 7 կուսակցություններին: Նամակը թվագրված է 2009 թ. մայիս ամսով:
Նշվում է, թե երկար քննարկումներից հետո 2009 թ. փետրվարին կոլաիցիա ձևավորած 4 կուսակցություններն անսպասելիորեն հայտարարեցին, որ այդ ընտրություններին ներկայանալու են առանձին-առանձին: Փաստաթղթում ասվում է, որ այս քայլով Հանրապետականը ցույց է տվել իր գործընկերներին, թե որքան ուժեղ է: Բացի այդ, չի ստացվի այնպես, որ կա երկու ճակատ՝ իշխանությունն ընդդեմ ընդդիմության, այլ կլինեն մի քանի ճակատներ:
Անդրադառնալով Հանրապետական կուսակցության թեկնածու Գագիկ Բեգլարյանին՝ դիվանագիտական նամակում ասվում է, որ Կենտրոնի նախկին թաղապետը, որը հայտնի է եղել անօրինական գործարքներ կնքելով, չի եղել Սերժ Սարգսյանի թիվ մեկ թեկնածուն: Սակայն նրան դրանում համոզել է ԱԺ նախագահ Հովիկ Աբրահամյանը:
Անդրադառնալով «Բարգավաճ Հայաստան» կուսակցությանը՝ նամակում նշվում է, որ այդ ժամանակ Սերժ Սարգսյանն ու Գագիկ Ծառուկյանը կարծես խոր հակասությունների մեջ էին, ինչի ապացույցն էր Ծառուկյանի կողմից վարվող տնտեսական քաղաքականության քննադատությունը:
Ընդդիմադիր դաշտի մասին խոսելիս՝ դիվանագետները նշում են, որ հիշատակման արժանին խորհրդարանում ներկայացված հիմնական ընդդիմադիր ուժի՝ «Ժառանգության» և Հայ ազգային կոնգրեսի հակասություններն են, որոնց հետևանքով խորհրդարանական ընդդիմությունը հրաժարվեց մասնակցել ընտրություններին: ՀԱԿ-ի ընդունած որոշումը, համաձայն որի՝ Լևոն Տեր-Պետրոսյանը պետք է գլխավորի ՀԱԿ ցուցակը, բացատրվում է նաև նրանով, որ 2008 թ. նախագահական ընտրությունների ժամանակ առաջին նախագահը հավաքել էր 28% ձայն: