Ադրբեջանական Зеркало թերթին տված հարցազրույցի ժամանակ Ադրբեջանում ԱՄՆ դեսպան Մեթյու Բրայզան անդրադարձել է ղարաբաղյան հակամարտության կարգավորմանը.
«Սպիտակ տան վարչակազմի համար առաջնահերթ է համարվում ղարաբաղյան հակամարտության շուտափույթ կարգավորումը։ Պակաս կարևոր չէ նաև Հայաստանի ու Ադրբեջանի հարաբերությունների կարգավորման հարցը։ Դա կարևոր ու այժմեական խնդիր է և գտնվում է մեր կառավարության արտաքին քաղաքականության առաջնային տեղերում։ Գիտեմ, որ այս տեսակետը կիսում են ԱՄՆ նախագահ Բարաք Օբաման ու պետքարտուղար Հիլարի Քլինթոնը։
Հունիսի 23-ին նախագահներ Սերժ Սարգսյանի ու Իլհամ Ալիևի հետ ունեցած անհատական հեռախոսազրույցների ժամանակ Օբաման հայտարարել է, որ տարածաշրջանի ստատուս քվոն անընդունելի է, և որ կողմերը պետք է համարձակ քայլեր ձեռնարկեն բանակցային ճանապարհով հակամարտության խաղաղ կարգավորման համար։
Նախագահն ընդգծել է, որ Հայաստանն ու Ադրբեջանը նախկինի նման ի վիճակի չեն ավարտին հասցնել հակամարտության կարգավորմանն առնչվող «հիմնարար սկզբունքների» համաձայնեցումը, ինչի արդյունքում էլ հակամարտությունը մնում է ապակառուցողական ու վտանգավոր իրավիճակում։
Նա նաև մտահոգություն է հայտնել շփման գծում լարվածության աճի հետ կապված։ Օբաման խորհուրդ է տվել ավելի համարձակ քայլեր ձեռնարկել խնդրի լուծման ուղղությամբ։ ԱՄՆ-ը՝ նախագահ Բարաք Օբամայի ու պետքարտուղար Հիլարի Քլինթոնի գլխավորությամբ, ԵԱՀԿ Մինսկի խմբի մյուս համանախագահող երկրների հետ շարունակելու է աջակցել «հիմնարար սկզբունքների» նախապատրաստման գործընթացին։
Մինսկի խումբը կողմերին օգնել է «հիմնարար սկզբունքների» բաղկացուցիչ տարրերի նախապատրաստման հարցում, ինչը միտված է խաղաղ ճանապարհով հակամարտության արդար կարգավորման ուղիների հետագա մշակմանը։ Կարծում եմ, որ հակամարտության կարգավորումը կողմերից պահանջելու է փոխզիջումներ։
Մադրիդյան սկզբունքների փաթեթը հիմնարար է և պարունակում է բոլոր անհրաժեշտ «հիմնարար սկզբունքները», որոնք նպաստում են խաղաղ ճանապարհով ղարաբաղյան հակամարտության կարգավորմանը։ Դրանում շարադրված են այն «հիմնարար սկզբունքները», որոնք գործածվելու են ճգնաժամի հաղթահարման ժամանակ. «խնդրի լուծման հարցում ուժի կիրառման անթույլատրելիություն, տարածքային ամբողջականություն, ազգային փոքրամասնությունների ինքնորոշման իրավունք»։
Տարիներ շարունակ ընթանում է ղարաբաղյան հակամարտության կարգավորման գործընթացը, սակայն, ինչպես երևում է, այսօրվա դրությամբ չկա որևէ դրական արդյունք։ Կողմերը չեն վստահում միմյանց, զիջումների ու փոխզիջումների չեն գնում, ինչով և ավելի են խորացնում խնդիրը։
Եթե այս հարցը չլուծվի մոտ ապագայում, ապա այն կարող է ձգձգվել ավելի տևական ժամանակով։ Մենք ձգտում ենք այս խնդիրը լուծել անցավ և կողմերի շահերի նվազագույն վնասման եղանակով։ Մադրիդյան սկզբունքներում կշռադատված ու ներկայացված են այդ խնդրի լուծման տարբերակները»։
