Պարենային գործարքի շուրջ աշխատանքները սկսվել են, հացահատիկով առաջին նավը շուտով կլքի ուկրաինական նավահանգիստը, հայտարարել է Թուրքիայի պաշտպանության նախարար Հուլուսի Աքարը քաթարյան Al Jazeera հեռուստաալիքին տված հարցազրույցում։ Այս մասին տեղեկանում ենք РИА Новости-ից։
Նա նշել է, որ Ռուսաստանի, Ուկրաինայի, Թուրքիայի և ՄԱԿ-ի ներկայացուցիչներն աշխատում են նավը ծով դուրս բերելու ուղղությամբ։
«Մենք աշխատում ենք հացահատիկի անվտանգ փոխադրման պլանի մշակման վրա: Նավերը կստուգվեն ուկրաինական նավահանգիստներում, ստուգմանը ներկա կլինեն Թուրքիայի և ՄԱԿ-ի ներկայացուցիչները»,- հավելել է Աքարը։
Նրա խոսքով՝ ուկրաինական կողմը հացահատիկով նավերը կառաջնորդի անվտանգ երթուղիներով։
Հիշեցնենք, որ հուլիսի 22-ին Ստամբուլում բազմակողմ համաձայնագրեր են ստորագրվել արտահանման համար ռուսական արտադրանքի մատակարարման սահմանափակումների վերացման և ուկրաինական հացահատիկի արտահանման հարցում Ռուսաստանի աջակցության վերաբերյալ։ Գործարքը, որը ստորագրել են Ռուսաստանի, Թուրքիայի, Ուկրաինայի և ՄԱԿ-ի ներկայացուցիչները, ենթադրում է ուկրաինական հացահատիկի, սննդամթերքի և պարարտանյութի արտահանում Սև ծովով երեք նավահանգիստներից, այդ թվում՝ Օդեսայից:
