Տեր Եսայի քահանա Արթենյանը այսօր լրագրողների հետ հանդիպմանը ասաց, որ աղանդները մեր երկրում գնալով շատանում են և հիշեցրեց, որ նրանք նույնիսկ ցանկանում են միավորվել Հայ առաքելական եկեղեցու դեմ.
«Նրանց նպատակը քրիստոնեություն քարոզելը չէ, նրանք ինչ-որ քաղաքական ու սոցիալական խնդիրներ են փորձում լուծել կրոնական քողի ներքո»։ Այն հարցին, թե չի համարում արդյոք քահանան , որ եկեղեցու թերացումն է աղանդների ավելացման պատճառը, Տեր Եսայի քահանա Արթենյանը պատասխանեց.
«Եկեղեցին անում է այն, ինչ արել է դարեր շարունակ, աղանդների տարածման պատճառը ոչ թե եկեղեցու թերացումն է, այլ՝ սոցիալական վիճակը»։ Այնուամենայնիվ, ըստ նրա, ուռճացված են այն թվերը, որ 300 000 աղանդավոր կա։ Քահանայի կարծիքով՝ նրանց թիվը 100 000 է։
Նրա համոզմամբ՝ աղանդների դեմ պայքարի համար պետք է կատարել օրենսդրական փոփոխությոններ և ավելի հստակ սահմանել խղճի ազատության օրենքը։ Անդրադառնալով այդ փոփոխությունների շուրջ իրավապաշտպանների քննարկումներին՝ քահանան ասաց.
«Այդ քայլերը արվում են Եվրոպային դուր գալու համար։ Նրանք առողջ կրոնական դաշտ ստեղծելու նպատակը չեն հետպնդում։ Եվրոպայում, օրինակ, երեխաների իրավունքները սրբորեն պաշտպանվում են, իսկ շատ աղանդներ մեզանում ոտնահարում են երեխաների իրավունքները»։
Նրա խոսքով՝ ամենավտանգավորը «Կյանքի խոսք» կրոնական կազմակերպությունն է.
«Դրա ներսում կատարվում են սարսափելի ծեսեր, օգտագործվում են բոլոր տեխնիկական և մտավոր հնարքները մարդկանց զոմբիացնելու համար։ Վտագավոր է նաև այնքանով, որ եկեղեցիների շարքում շատ են հարուստ քաղաքացիները և շոու բիզնեսի ներկայացուցիչները»։
Ըստ քահանայի՝ աղանդների երկրորդ վտանգավոր ներկայացուցիչները Եհովայի վկաներն են։
