Այսօր WikiLeaks-ը հրապարակել է Հայաստանին վերաբերող ԱՄՆ դիվանագիտական ևս մեկ փաստաթուղթ, որը վերաբերում է 2004 թ. ընդդիմության հանրահավաքները արգելելու, դաժանաբար ճնշելու և իշխանությունների կողմից իրականացվող քաղաքականության մանրամասներին:
Ըստ 2004 թ. ապրիլի վերջին պատրաստված փաստաթղթի, 2004 թ. ապրիլի 27-ին՝ ընդդիմության հանրահավաքից առաջ արտաքին գործերի նախարար Վարդան Օսկանյանը հավաքել է Հայաստանում հավատարմագրված դիվանագետներին և մի շարք ուշագրավ հայտարարություններ արել: Ըստ Օսկանյանի՝ Հայաստանն այդ օրերին ապրել է իր պատմության «ամենակրիտիկական պահերից մեկը» և կոչ է արել միջազգային հանրությանը` օգնել կառավարությանը կայունություն ապահովելու համար:
Նա նշել է, որ եթե ընդդիմությունը փորձի շրջապատել նախագահական նստավայրը և թույլ չտալ, որպեսզի Քոչարյանը Եվրոպայից վերադառնա և մուտք գործի իր նստավայր, ապա կառավարությունը ստիպված կլինի դիմել Սահմանադրության 55-րդ հոդվածին` «սահմանադրական կարգը վերականգնելու համար համապատասխան միջոցառումներ ձեռնարկելու համար»: Իր ելույթում Օսկանյանը հակասահմանադրական է համարել ընդդիմության կոչերը` Քոչարյանի հրաժարականի վերաբերյալ, քանի որ ընդդիմությունը զգուշացրել է, որ այդ նպատակին հասնելու համար կարող է ուժ կիրառել:
Օսկանյանը շնորհակալություն է հայտնել 2004թ. ապրիլի 12-13-ին ընդդիմության հանրահավաքը ցրելուց հետո արված հայտարարությունների համար՝ այդուհանդերձ նշելով, որ միջազգային հանրության հայտարարություններում բացակայում էր կառավարությանը ուժով գահընկեց անելու դատապարտումը, ինչը որոշ ընդդիմադիրների կողմից դիտվել է որպես «իրենց մարտավարության հավանություն»:
