Անօրինական ճանապարհով՝ առանց մաքսազերծման, Չինաստանից Հայաստան են ներկրվում ալմաստային գործիքներ, ինչը զգալի վնաս է հասցնում թե՛ պետությանը, թե՛տեղական արտադրողին: Նման հայտարարություն այսօր լրագրողների հետ ճեպազրույցում արեց «Ալմաստ» ԲԲԸ-ի տնօրեն Վահրամ Թեփելիկյանը:
Նրա խոսքով՝ եթե չինական սարքավորումները ներկրվեն օրինական եղանակով, ապա դրանց մրցակիցներ լինել չեն կարող: «Առաջին լրատվական»-ի հարցին, թե որ ընկերությունն է ներկրում, Վ.Թեփելիկյանը պատասխանեց, որ ներկրողն ընկերություն չէ, այլ անձեր են. «Հարցը բարձրացվել է, որոշակի քայլեր ձեռնարկվում են այդ ուղղությամբ և, հուսով ենք, որ դրանք շարունակական կլինեն, և մեր իրացման ծավալները կաճեն: Այդ անօրինական ներկրումը մշտական բնույթ է կրում, սեգմենտները պայուսակներով են բերում»:
«Ալմաստ»-իտնօրենը տեղեկացրեց, որ ներկայում մշակում ենգործարանի ներդրումային ծրագիրը: 2011 թ. հունվար-հուլիս ամիսներին թողարկվել է 81.5 մլն դրամի արտադրանք, որը շուրջ 2 անգամ գերազանցում է նախորդ տարվա նույն ժամանակահատվածի ցուցանիշները: Իրացվել է 77 մլն դրամի արտադրանք (աճի տեմպը՝ 179.2%), որից 29.4 մլն դրամի արտադրանքն արտահանվել է (աճը՝ 12 անգամ):
«Աճը պայմանավորված է նոր շուկաներ ձեռքբերելով, մասնավորապես՝ իրանական շուկան: Ներկայում աշխատանքներ են տարվում եվրոպական շուկա մուտք գործելու համար, որոշ չափով արատահնում կա ԱՄՆ, Վրաստան: Փոքր խմբաքանակներ արտահանել ենք նաև Ռուսաստան»,- ասաց Վ.Թեփելիկյանը՝ հավելելով, որ ՌԴ-ում դեռ հիմնական գործընկեր չեն գտել:
Ըստ նրա՝ մշտապես նախագծվում և պատրաստվում են նոր գործիքներ, նաև այնպիսի, որոնք շատ յուրահատուկ են, օրինակ՝սապֆիրի արտադրության համար:
«Ալմաստ»-ն այսօր աշխատում է հզորությունների 15-20%-ի չափով: Ներքին շուկայում իրացվում է արտադրանքի շուրջ կեսը: Գործարանում աշխատում է 65 մարդ՝ 80-100 հզ. դրամ միջին աշխատավարձով: Տնօրենը համաձայնեց, որ այդ գումարն ընտանիքի ծախսերը հոգալու համար շատ քիչ է, սակայն հավաստեց, որ 1 տարի հետո աշխատավարձերն ավելի բարձր կլինեն:
Վ.Թեփելիկյանըհրաժարվեց կազմակերպչական խնդիրներից խոսել, մասնավորապես, նա չասաց, թե ո՞ւմ է պատկանում «Միջազգային բիզնես կենտրոն» ՓԲԸ-ն, որին 2001 թ. վաճառվել է գործարանի պետական բաժնեմասը:
Իսկ «Առաջին լրատվական»-ի այն հարցին, թե ինչո՞ւ է միայն 10 տարի անց մշակվում ներդրումային ծրագիր,Վ.Թեփելիկյանը պատասխանեց, թե 2001-ին էլ են ներդրումներ արվել, որոնց շնորհիվ գործարանն այսօր ընդհանրապես գործում է. «Սարքավորումները,թեև հին են, բայց բոլորը կապիտալ վերանորոգվել են և դեռ կարող են մրցունակ արտադրանք տալ: Գործարանը 2001-ին շատ տխուր վիճակում էր, ամբողջը վերանորոգվել է»:
ՀՀ էկոնոմիկայի նախարար Տիգրան Դավթյանը Չինաստանից ներկրվող չմաքսազերծված նույնատիպ ապրանքի վերաբերյալ նշեց, որ պետք է ամեն ինչ անել՝ տեղական շուկան և ձեռնարկությունները լավագույն պայմաններովապահովելու համար. «Պետք է պաշտպանել արտադրողներին, մրցակցային դաշտ ապահովել, այդ թվում նաև անորակ և հաճախ նույնիսկ անհասկանալի ճանապարհով մեր շուկա ներթափանցած արտադրատեսակներից, առավել ևս, որ մենք արտադրում ենք նման սարքավորումներ»: