Հայ ազգային կոնգրեսի համակարգող, ՀԱԿ-իշխնություն երկխոսության մասնակից ՀԱԿ պատվիրակության ղեկավար Լևոն Զուրաբյանն այսօր լրագրողներին ներկայացրեց երկխոսության վերջին երկու հանդիպումների այն դրվագները, որոնք գաղտնի են պահվել լրագրողներից փոխհամաձայնության պատճառով:
Զուրաբյանը տեղեկացրեց, որ օգոստոսի 16-ին տեղին ունեցած 5-րդ հանդիպման ժամանակ քննարկվել է օգոստոսի 9-ին Կոնգրեսի երիտասարդ ակտիվիստների եւ ոստիկանության աշխատակիցների միջև տեղի ունեցած միջադեպի հետևանքով ձերբակալված երեք երիտասարդների ազատ արձակումը:
«Այդ օրը, երկխոսության ընթացքում առաջին անգամ որոշվեց, հարգելով իշխանության պատվիրակության խնդրանքը, առայժմ չհրապարակել քննարկման մանրամասները: Պատվիրակությունը նման խնդրանք ներկայացրեց, պատճառաբանելով, որ դա կհեշտացնի խնդրի լուծումը: Իսկ քանի որ հակառակ Կոնգրեսի պատվիրակության սպասումների, խնդիրը այդպես էլ չստացավ լուծում, ժամանակն է հրապարակել թե ինչ է տեղի ունեցել բանակցությունների վերջին երկու ռաունդներում»,- նշեց Զուրաբյանը:
Զուրաբյանի խոսքերով` 5-րդ ռաունդի հենց սկզբից Կոնգրեսի պատվիրակությունը հայտարարել է, որ բանակցությունների բնականոն ընթացքի համար անհրաժեշտ է լուծել ձերբակալված երիտասադների խնդիրը, քանզի ոստիկանության ներկայացրած վարկածի կեղծիքը, երիտասարդների նկատմամբ բռնություններն ու դրանց աննախադեպ դաժանությունը, փաստաբանների ապօրինի ազատազրկումը և նրանց նկատմամբ կատարված բռնությունները, գործին ներգրավվելու մերժումը և դրանից բխող ձերբակալության ապօրինությունը վկայում են, որ գործ ունենք հալածանքների հետ, որոնք կրում են ակնհայտորեն քաղաքական բնույթ, ուստի Կոնգրեսն իրեն իրավունք է վերապահում բոլոր ձերբակալվածներին դիտարկելու որպես քաղբանտարկյալներ: Կոնգրեսը նաև շեշտել է, որ քաղբանտարկյալների առկայության պայմաններում հնարավոր չէ բանակցել և, որպես լուծում, իշխանության պատվիրակությանն առաջարկվել է ստորագրել Կոնգրեսի կողմից ներկայացվքած մի փաստաթուղթ: Այդ փաստաթուղթը ներկայացնում ենք Ձեր ուշադրությանը.
Իշխող Կոալիցիայի աշխատանքային խմբի եւ Հայ Ազգային Կոնգրեսի պատվիրակության ներկայացուցիչներս. Դավիթ Հարությունյանը, Գագիկ Մինասյանը, Վարդան Բոստանջյանը, Նաիրա Զոհրաբյանը, Մհեր Շահգելդյանը, Խաչիկ Հարությունյանը եւ Լեւոն Զուրաբյանը, Դավիթ Շահնազարյանը, Ֆելիքս Խաչատրյանը, Սամվել Աբրահամյանը, Վահագն Խաչատրյանը`
• իշխանության և ընդդիմության երկխոսության գործընթացի համար բարենպաստ մթնոլորտ ապահովելու և փոխադարձ վստահության բարձրացմանն ուղղված քայլերի իրականացման նպատակով,
• գիտակցելով, որ Հայ Ազգային Կոնգրեսի երիտասարդ ակտիվիստների և ոստիկանության աշխատակիցների միջև օգոստոսի 9-ի միջադեպի հետեւանքով առաջացած լարվածությունը պետք է լիցքաթափվի Հայաստանի օրենքների պահանջների, միջադեպի թափանցիկ և օրինական քննության ապահովման և անմեղության կանխավարկածի սկզբունքի հարգման հիման վրա,
1. Ընդունում են իշխող Կոալիցիայի տված երաշխիքները, որ իշխանությունները ամեն ինչ կանեն, որ իրավապահ մարմինները օրենքի պահանջներին համապատասխան լրջագույնս քննեն ինչպես ոստիկանության պնդումները` երիտասարդ ակտիվիստների հակաօրինական գործողությունների մասին, այնպես էլ ընդդիմության ակտիվիստների պնդումները` իրենց և իրենց փաստաբանների նկատմամբ ոստիկանության կողմից բռնության կիրառման և իրավունքների ոտնահարման մասին, ինչպես նաև իրենցից կախված բոլոր անհրաժեշտ միջոցները կձեռնարկեն, որ Տիգրան Առաքելյանի, Արտակ Կարապետյանի և Սարգիս Գեւորգյանի նկատմամբ որպես խափանման միջոց կիրառվի անձնական երաշխավորությունը
2. Ընդունում են Հայ Ազգային Կոնգրեսի տված երաշխիքները, որ կապահովվի վերոնշյալ անձանց պատշաճ վարքագիծը, քրեական վարույթն իրականացնող մարմնի կանչով նրանց ներկայանալը և այլ դատավարական պարտականությունների կատարելը
Կոնգրեսի պատվիրակությունը պատճառաբանեց, որ այս քաղաքական գործընթացը լիովին տեղավորվում է Քրեադատավարական օրենքի շրջանակների մեջ, ապահովում է բաց դատաքննության հնարավորությունը, որի շրջանակներում էլ կպարզվի, արդյոք որևէ մեկը քրեորեն պատժելի արարք է կատարել:
Լևոն Զուրաբյանը, շարունակելով ներկայացնել մանրամասները, նշեց, որ փաստաթղթի ներկայացնելուց հետո, իշխանական պատվիրակությունը ժամանակ է խնդրել հարցը քննարկելու և պատասխանելու համար, որից հետո փոխվեցին Արտակ Կարապետյանի և Սարգիս Գևորգյանի խափանման միջոցները, իսկ օգոստոսի 23-ին տեղի ունեցած 6-րդ ռաունդի ժամանակ իշխանությունները մերժելով ստորագրել Կոնգրեսի ներկայացված փատաթուղթը, փոխարենը հավաստիացումներ են տվել, որ իրավական «ոչ խտրական» գործընթացը կտարածվի բոլորի վրա:
Նկատենք, որ այդ մասին Դավիթ Հարությունյանը հայտարարեց նաև լրագրողներին 6-րդ հանդիպումից հետո:
Զուրաբյանը նաև հավելեց, որ 6-րդ ռաունդից հետո էլ համաձայնություն է ձեռք բերվել լրագրողների առջև փոխհամաձայնեցված հայտարարությամբ հանդես գալ, ինչի արդյունքում էլ ինքը լրագրողներին ասել է, թե վստահ է, որ Տիգրան Առաքելյանի խափանման միջոցը կփոխվի:
Զուրաբյանը նշեց, որ երկխոսությունն առկախվել է հենց այս ամենի պատճառով, ինչպես նաև ներկայացրեց ևս 8 պատճառներ, որոնց կարող եք ծանոթանալ այստեղ
