Ռոբերտ Քոչարյանի որդին՝ Լևոն Քոչարյանը, որն այս օրերին մեկնել է ԱՄՆ՝ այնտեղ ծննդաբերելու մեկնած տիկնոջ կողքին լինելու համար, գրառում է արել Ֆրանսիայի հրապարակից վրանները հավաքելու և փաստացի փողոցի շարժումը դադարեցնելու վերաբերյալ որոշման կապակցությամբ: Նա նշել է, որ կա երկու տարբերակ՝ հուսահատվել և մեղավորներ փնտրել, թե՞ վերլուծել ձեռքբերումներն ու բացթողումները, սթափ գնահատել իրավիճակն ու շարունակել պայքարը: Լևոն Քոչարյանն արել է պայքարը շարունակելու տարբերակն ընտրելու կոչ: Ռոբերտ Քոչարյանի որդու կոչը ուշագրավ է: Խոսքն իհարկե դրա քարոզչական տրամաբանության մասին չէ: Այդ տրամաբանությունը եղել է, կա ու թերևս կշարունակի լինել հայաստանյան բոլոր շրջափուլերի ընդդիմություններին ընդհանուր գծերից մեկը: Բոլորն էլ որևէ անարդյունավետ շրջափուլից հետո խոսել են պայքարը շարունակելու մասին: Այստեղ ուշադրության է արժանի ավելի տողատակային քաղաքական հարթությունը, ինչի մասին, ի դեպ, առիթ եմ ունեցել գրելու և խոսելու բազմիցս՝ ներկայիս խորհրդարանական ընդդիմության գործունեության, մասնավորապես Հայաստան դաշինքի «կազմության» վերաբերյալ: «Հայաստան» դաշինքը գործնականում դաշինք է Ռոբերտ Քոչարյանի և ՀՅԴ միջև: Եվ այդ հանգամանքը բավականին նրբորեն նկատվում էր նաև այս 45 օրերի ընթացքում: Տեղի ունեցողի հիմնական երկու դեմքերը Իշխան Սաղաթելյանն ու Լևոն Քոչարյանն էին, մեկը ՀՅԴ պատվիրակը, մյուսը՝ Ռոբերտ Քոչարյանի որդին: Քաղաքականությունը հարաբերությունների բարդ և բազմաբնույթ մեխանիզմ է, որտեղ լայն արդյունքների բացակայությունը միշտ նեղացնում է գործակցության ընդհանուր եզրերը և լայնացնում տարակարծությունների դաշտը: Եվ այստեղ, խոսելով խորհրդարանական ընդդիմություն-նախկին կառավարող համակարգ փոխհարաբերության մասին, պետք է թերևս նկատել, որ տարակարծությունները լոկ Սերժ Սարգսյան-Ռոբերտ Քոչարյան դաշտում չեն, այլ նաև՝ Ռոբերտ Քոչարյան-ՀՅԴ տիրույթում: Ի վերջո, չպետք է մոռանալ այն, որ 2014 թվականին ՀՅԴ-ն թողեց Ռոբերտ Քոչարյանին և ընտրեց Սերժ Սարգսյանի առաջարկը՝ 2015-ի Սահմանադրություն, տեղ նոր խորհրդարանում և կառավարությունում:
Ռոբերտ Քոչարյանը, որը չի մոռանում իրեն հասցված ոչինչ, անկասկած չի մոռացել և դա, ինչպես նաև այն, թե ինչ էր հայտարարում այդ տարիներին ՀՅԴ ԳՄ ներկայացուցիչ Արմեն Ռուստամյանը՝ Քոչարյանի քաղաքականություն վերադարձի մասին. «Վերադարձողը վերադառնում է՝ չի սպասում պայմանների»: ՀՅԴ-ն այդ շրջանում «չսպասեց» Ռոբերտ Քոչարյանին և որոշեց պայմանավորվել Սերժ Սարգսյանի հետ, հետո էլ՝ Նիկոլ Փաշինյանի հետ, թավշյա հեղափոխության համատեքստում: Դաշնակցությունը ըստ էության «դուրս եկավ» պայմանավորվածություններից այն բանից հետո, երբ Նիկոլ Փաշինյանից չստացավ 2018-ի արտահեր խորհրդարանական ընտրությանը անցնելու երաշխիք: Սեփական ուժով անցնել ՀՅԴ մոտ չստացվեց: Դրանից հետո ՀՅԴ-ն վերստին պայմանավորվեց Ռոբերտ Քոչարյանի հետ: 45-օրյա «շարժումը» գործնականում կարող է դառնալ այդ պայմանավորվածության վերջի սկիզբ և խոշոր հաշվով, իրավիճակը վերլուծելու Լևոն Քոչարյանի հայտարարությունը թերևս պարունակում է նաև այդ տողատակը, հաշվի առնելով այն, որ այդ գործընթացի առաջնորդությունը «հանձնվել» էր ՀՅԴ-ին, ինչը սակայն տապալվել է կատարելապես: Ըստ այդմ, նոր «մարտավարություն» ասվածը կամ ենթադրելու է Ռոբերտ Քոչարյանի և ՀՅԴ «բաժանման» մեկնարկ, կամ ուժերի հարաբերակցության փոփոխություն և ՀՅԴ-ն կմնա, բայց բացառապես Ռոբերտ Քոչարյանի պայմաններով: