Վանաձորի համայնքապետարանը դատի է տվել համայնքի նախկին ղեկավար Սամվել Դարբինյանին՝ պահանջելով հատուցել իր պաշտոնավարման տարիներին քաղաքին պատճառած վնասը, թեև ավելի վաղ դատարանը համարել էր, որ անցել է նախկին պաշտոնյային պատասխանատվության ենթարկելու վաղեմության ժամկետն ու դադարեցրել էր քրեական հետապնդումը։
Դատարանն անցած տարի ապացուցված էր համարել, որ Վանաձորի 17 տարվա ղեկավար Դարբինյանը 2000-ականներին ծառայության շահերին հակառակ է գործել, կեղծիք կատարել ու իր հարազատների անունով ապօրինի օտարել համայնքին պատկանող տարածքները, շենք-շինությունները և քաղաքին պատճառել առանձնապես խոշոր՝ ավելի քան 60 միլիոն դրամի վնաս։ Դատարանը նախկին քաղաքապետի մեղքը հաստատել, բայց կարճել էր գործը, նրան ազատել պատասխանատվությունից, քանի որ հանցանքը տեղի է ունեցել ավելի քան տասը տարի առաջ։
Միաժամանակ քրեական գործը կարճելուց հետո Լոռու մարզի դատախազը հայտարարել էր, թե նախկին համայնքապետի մեղքը հաստատված է, պատճառված վնասը հաշվարկված, ուստի համայնքապետարանն իրավունք ունի քաղաքացիական հայց ներկայացնել ու Դարբինյանի յուրացրած, վաճառած ու նվիրած տարածքները հետ պահանջել։
«Մենք քրեական դատավարությամբ սահմանված կարգով հիմնավորել ենք անձի կողմից այս արարքները կատարելու հանգամանքը ու այդ դատական ակտը, որը կայացրել է Լոռու մարզի առաջին ատյանի ընդհանուր իրավասության դատարանը, թույլ է տալիս, որպեսզի համայնքի իրավասու անձինք նշված գույքը համայնքի հաշվեկշիռ բերեն, ինչպես նաև պատճառված վնասը վերականգնելու ուղղությամբ համապատասխան հայցեր ներկայացնեն», – ասել է համայնքապետի ժամանակավոր պաշտոնակատար Արկադի Փելեշյանը:
Ինքը՝ Սամվել Դարբինյանը «Առաջին լրատվական»-ի հետ զրույցում հայտարարեց, որ ինքը Վանաձոր քաղաքին վնաս չի պատճառել. «Ինչը հիմա անում են, անօրինական բան է լինելու: Նա նշեց, որ 2,5 տարի այնքան են տարել-բերել, զզվել է և համաձայնել, որ վաղեմության ժամկետը լրանալու հիմքով քրեական հետապնդումը դադարեցվի:
«Իրենք ոչ մի բան էլ չեն գտել, որովհետև ես օրինական եմ աշխատել: Իմ աշխատած տարիներին ոչ մի կեղծիք չի եղել: Իրենք դժվար կհասկանան, որ ժամանակի ընթացքում պետք էր ժողովրդին իր հողին կապել, ոչ թե ամեն ինչից զրկել, որ թողնեն գնան: Ամեն ինչ տվյալ ժամանակ մեջ են նայում, ոչ թե 20-30 տարի հետո ուզում են նախկին արածները նայել»,-ասաց նա:
Նախկին քաղաքապետը պնդեց, որ միշտ օրինական դաշտում է աշխատել. «Ես 17 տարիների ընթացքում ունեցել եմ շատ լավ իրավաբան, շատ լավ ճարտարապետ, շատ լավ աշխատակազմի ղեկավար ու լավ տեղակալ, որոնք ամեն մի քայլ արել են օրենքի տառին համապատասխան, առանց օրինական դաշտի որևէ գործողություն երբևէ չի կատարվել Վանաձորի համայնքապետարանում»,-ընդգծեց նա:
Անդրադառնալով նրան, որ իրեն մեղադրում են քաղաքի հողերը ապօրինի կերպով օտարել է իր հարազատների անունով, Սամվել Դարբինյանն ասաց. «Համայնքի ղեկավարը պետք է համայնքի բոլոր տարածքները կարողանա ճիշտ ձևով աճուրդի դնի, վաճառի, որպեսզի այդ ազատ հողակտորների համար քաղաքացիները աճուրդային եղանակով վերցնեն, դրա վրա շինություններ սարքեն, գույքահարկ ու հողի հարկ տան, որ քաղաքը բյուջե ունենա: Իսկ էս մարդիկ չգիտեմ՝ ինչ են հասկանում նախկին ու ներկա ասելով: Իրենցից ո՞րը չի նախկին: Բոլորն էլ նախկինն են: Հիմա իրենք ավելի շատ նախկին են: Իրենք չեն հասկանում, որ կար ժամանակ, որ բնակչությանը պետք էր իրենց հող ու ջրում մի բան ունենային, որ ապրեին: Ասում են՝ ինչո՞ւ է վաճառել, բա ի՞նչ պետք է անեի, հողերը թողնեի բարձիթողի մնար, որ ոչ բյուջե հավաքվեր, որ գույքահարկ ու հողի հարկ տվող լիներ: Էդ էին ուզո՞ւմ, իրենք հիմա տե՞նց են վարվում: Ես չգիտեմ, չեմ էլ հետևում»,-նշեց նախկին քաղաքապետը:
Նա հավելեց, որ հիմա թոշկառու է, ապրում է Վանաձորում և քաղաքականությամբ էլ չի հետաքրքրվում. «Էդ իրենք են, որ փոխանակ աշխատեն, նյութական բարիք ստեղծեն, իրենց համայնքները բարեկարգեն, բարելավեն, ընկել են նախորդների հետևից: Սա է ընդամենը»,-ասաց նա:
Հարցին, թե ինչպես է գնահատում Վանաձորի համայնքապետի պաշտոնակատար Արկադի Փելեշյանին, նա պատասխանեց. «Նորմալ եմ գնահատում: Նախապես ոչինչ չեմ կարող ասել, մարդը պետք է աշխատի, որ տեսնենք՝ կարողանում է, թե ոչ»:
Հիշեցնենք, որ 2021-ի խորհրդարանական արտահերթ ընտրությունների ժամանակ Սամվել Դարբինյանն ակտիվորեն մասնակցել է Ռոբերտ Քոչարյանի քարոզարշավին և իր հարցազրույցներից մեկում նշել. « «Ես կուզեի, որ մեր ժողովուրդը ճիշտ կողմնորոշվի, մենք մեր ապագան պետք է կապենք միմիայն Ռոբերտ Քոչարյանի հետ, որովհետև նա կարող է մեր երկիրը տանել դեպի զարգացում և պայծառ ապագա»:
