Ադրբեջանական Trend լրատվական գործակալության փոխանցմամբ՝ Ադրբեջանում Թուրքիայի դեսպան Հուլուսի Քըլըչը հայտարարել է, որ Ադրբեջանն ու Թուրքիան հաջողությամբ շարունակում են գազային համաձայնագրի փաթեթի վերաբերյալ բանակցությունները։ Դրանք մասնավորապես վերաբերում են Թուրքիայի տարածքով ադրբեջանական գազի՝ դեպի Եվրոպա տարանցման մասին պայմանագրի կնքմանը։
Քըլըչի խոսքերով՝ պլանավորված է, որ այդ բանակցությունները կավարտվեն սեպտեմբերին։
Հիշեցնենք, որ Թուրքիայի էներգետիկայի ու բնական պաշարների նախարար Թաներ Յըլդըզը երեկ Reuters-ին տված հարցազրույցի ժամանակ հայտարարել էր, որ Թուրքիան ցանկանում է մինչև սեպտեմբերի վերջը պայմանավորվել ադրբեջանական «Շահ Դենիզ» գազային հանքավայրի գազի տարանցման շուրջ։ Խոսքը «Շահ Դենիզ 2»-ի շրջանակներում Թուրքիային տարեկան 6 միլիարդ խորանարդ մետր գազ մատակարարելու և նրա տարածքով տարեկան 10 միլիարդ խորանարդ մետր գազի տարանցման մասին է։
Յըլդըզը նշել էր. «Ես մեր ադրբեջանցի ընկերներին խորհուրդ եմ տվել արագացնել գործընթացը։ Մենք ցանկանում ենք ավելի շուտ ստորագրել այդ պայմանագիրը (վերջնաժամկետը սեպտեմբերի վերջն է)։ Մենք՝ Թուրքիայի Հանրապետությունը, արել ենք հնարավորը։ Այդ նախագիծն արագացնելու համար անհրաժեշտ է ստորագրել գազային համաձայնագիրը»:
