Օգոստոսի 9-ի միջադեպի պատճառով ձերբակալված ՀԱԿ ակտիվիստ Տիգրան Առաքելյանի պաշտպան Վարդուհի Էլբակյանն այսօր բողոք է ներկայացնելու Վճռաբեկ դատարան` Առաքելյանի կալանավորման որոշումը վերացնելու խնդրանքով:
Հիշեցնենք, որ նույն դիմումը Էլբակյանը ներկայացրել էր Վերաքննիչ դատարան, սակայն այնտեղ մերժել էին՝ պատճառաբանելով, որ խափանման միջոցը փոխելու համար ներկայացված պատճառները հիմնավոր չեն:
«Առաջին լրատվականի» հետ զրույցում Վարդուհի Էլբակյանը նշեց, որ իրենց համար ընդունելի չեն բողոքը մերժելու Վերաքննիչ դատարանի հիմքերը. «Այդ պատճառով բողոքը ներկայացնելու ենք վճռաբեկ դատարան և ամբողջը հիմնավորվելու է նախադեպային որոշումներով»:
Էլբակյանը շեշտեց, որ երաշխիքները ավելի քան բավարար են, որպեսզի Տիգրանի խափանման միջոցը փոխվի:
Հարցին, թե ինչքանով է հավանական, որ Վճռաբեկ դատարանը կբավարարի բողոքը, պաշտպանը պատասխանեց. «Մեր դատական համակարգը անկանխատեսելի է, և օրենքի միատեսակ կիրառելիությունը մեզ մոտ խաթարված է: Իհարկե, հույսեր կան, բայց այլ հարց է, թե արդյոք դատարանը օրենքո՞վ կշարժվի»:
Վարդուհի Էլբակյանը նշեց, որ եթե Վճռաբեկ դատարանն էլ չբավարարի իր բողոքը, ապա ինքը բողոք է ներկայացնելու ՄԻ Եվրոպական դատարան. «Մենք ունենք նման նախադեպ, երբ Եվրոպական դատարանը նախկինում Տիգրան Առաքելյանի գործը վարույթ է ընդունել, և անգամ ներողություն է խնդրել վարույթ իրականացնող մարմինը»:
