Վլադիմիր Զելենսկին այցելել է Զապորոժիե։ Սա Ուկրաինայի նախագահի երկրորդ պաշտոնական այցն է՝ պատերազմի սկզբից ի վեր։ Զելենսկին նախկինում այցելել էր Խարկովի մարզ։
Զելենսկին հանդիպել է Մարիուպոլից տարհանվածների հետ, ինչպես նաև՝ ծանոթացել առաջնագծում իրավիճակին։ Հիշեցնենք, որ Զապորոժիեի շրջանի զգալի մասը գտնվում է ռուսական բանակի վերահսկողության տակ։ Միևնույն ժամանակ, մայրաքաղաք Կիևը վերջին շաբաթների ընթացքում առաջին անգամ հրթիռակոծվել է։
Կիևի քաղաքապետ Վիտալի Կլիչկոն հայտարարել է Դնեպրի և Դառնիցկի շրջաններում մի քանի պայթյունների մասին։
ՌԴ ՊՆ տվյալներով՝ ավիահարվածի արդյունքում ոչնչացվել են ավտովերանորոգման ձեռնարկության շենքերում տեղակայված Տ-72 տանկեր և այլ զրահատեխնիկա, որոնք Ուկրաինա են ժամանել Արևելյան Եվրոպայից։
Նախօրեին ՌԴ նախագահ Վլադիմիր Պուտինը խոստացել էր ընդլայնել «ռազմական գործողության» նպատակները, եթե Արևմուտքը Կիևին ավելի հեռահար զենքեր մատակարարի։
Չնայած նախազգուշացմանը՝ Բրիտանիան հայտնել է, որ պատրաստվում է ավելի ժամանակակից հրթիռային հրետանի ուղարկել Ուկրաինա։
