Այս տարվա առաջին եռամսյակում Հայաստան է եկել շուրջ 142 հազար ՌԴ քաղաքացի, որը նախորդ տարվա համեմատ ավելի է շուրջ 100 հազարով: Ընդ որում, այս տարվա հունվարին Հայաստան է եկել 47,4 հազար ՌԴ քաղաքացի, փետրվարին՝ 40 հազար քաղաքացի, մարտին՝ 54,7 հազար քաղաքացի: 2022-ի առաջին եռամսյակում Հայաստանից գնացել է 138 հազար ՌԴ քաղաքացի: Տարբերությունը, այսինքն սահմանահատումների մնացորդի թիվը շուրջ 4000 է:
Մասնագետները նշում են, որ տարբերությունը ընդամենը 4 հազար նաև այն պատճառով, որ հունվարին ու փետրվարին ՌԴ քաղաքացիների ելքը շատ մեծ է եղել, և այդ ելքի մեջ արտացոլված են ՌԴ քաղաքացի հանդիսացող հայ աշխատանքային միգրանտները, որոնք գարնանը, ձմռանը մեկնում են ՌԴ-ում աշխատելու:
Ինչ վերաբերում է Ուկրաինայի քաղաքացիներին, ապա այս տարվա առաջին եռամսյակում Հայաստան է եկել 5938 Ուկրաինայի քաղաքացի՝ նախորդ տարվա նույն ժամանակի 2531-ի համեմատ: Եռամսյակի տվյալներով Հայաստանից գնացել է Ուկրաինայի 5631 քաղաքացի: Սահմանահատումների մնացորդը 307 է, համեմատության համար 2021-ի առաջին եռամսյակի արդյունքներով սահմանահատումների մնացորդը եղել է 68: Եռամսյակի տվյալներով Հայաստանում մնացած Ուկրաինայի շուրջ 300 քաղաքացիներից 200-ը ապաստան է հայցել Հայաստանից:
Այս առնչությամբ տարածքային կառավարման և զարգացման նախարարության միգրացիոն ծառայության պետ Արմեն Ղազարյանը «Առաջին լրատվական»-ի հետ զրույցում նշեց, որ ապաստան հայցողները, որոնք ստանում են փախստականի կարգավիճակ, օգտվում են գրեթե բոլոր իրավունքներից, ինչ որ քաղաքացիները, բացի ընտրական իրավունքից: Նրանց իրավունքները գրեթե հավասարեցված են:
Հարցին, թե ինչ հնարավորություններից են օգտվում փախստականները, արդյոք նրանց տրվում է կացարան, Արմեն Ղազարյանը պատասխանեց. «Ապաստանը կացարան չի նշանակում, նշանակում է պաշտպանություն և չվերադարձելիության հնարավորությունը: Սա այն պարագան է, որ ինչ հնարավորություն էլ, որ տվել ենք, հիմնականում սրանք այն մարդիկ են, որոնք պետության տված հատուկ կացարանից չեն օգտվել: Մեծ մասը ունեցել են բարեկամներ, իրենք իրենց ուժերով այդ հարցը լուծել են: Այլապես, ապաստանի ընթացակարգում տրվում է ժամանակավոր կացարան, դրանից հետո եթե համապատասխան հանրակացարանային տարածքում ազատ սենյակ է լինում, ինքը կարող է տրամադրվել մինչև մեկ տարի ժամկետով»: