«Միանշանակ, ես երկխոսությունը դրական եմ համարում, որովհետև սա անմիջական կոնտակտ է հակառակորդ քաղաքական ուժերի միջև, և սեղանի մոտ նստել ու խոսելը շատ ավելի լավ է, քան մեկն օգտագործում է ԶԼՄ, մյուսն էլ՝ Թատերական հրապարակը: Ժամանակն է, որ մարդիկ նստեն դեմ-դիմաց և ասեն միմյանց այն, ինչ ունեն»,- ՀԱԿ-իշխանություն երկխոսությունն այսպես գնահատեց ԼՂՀ նախկին արտգործնախարար Արման Մելիքյանը:
Այդուամենայնիվ, Մելիքյանին չի բավարարում երկխոսության օրակարգը, որովհետև այն սահմանափակված է միայն ընտրությունների հարցով, ինչն, ըստ բանախոսի, Հայաստանի համար որևէ խնդիր չի լուծում. «Մինչև մենք չհասկանանք, թե որ պայմաններն են ստիպում ամեն անգամ ընտրությունները կեղծել, և Հայաստանն, ի վերջո, ինչու է վերածվել կոռուպցիոն կառավարման համակարգ ունեցող պետության, մենք որևէ արդյունք ակնկալել չենք կարող»:
Արման Մելիքյանի կարծիքով՝ կողմերը նստել են սեղանի մոտ՝ վստահ լինելով, որ այս երկխոսության մեջ հաղթողն հենց իրենք են լինելու: Սակայն, ըստ Մելիքյանի, երկխոսությունը արդյունք բերի թե չբերի կողմերին, Հայաստանի հանրության համար այն օգտակար է, քանզի եթե ՀԱԿ-ը և իշխանությունը կարողանան գալ խելամիտ լուծումների, դա կբխի հանրության շահերից: Իսկ եթե կողմերն ընդունելի լուծումների չհանգեն, Մելիքյանն համոզված է, որ անգամ այդ դեպքում հանրությունը կշահի, քանզի երկուսի վարկն էլ կընկնի, և այլընտրանքային ուժի պահանջարկը շատ ավելի ակնհայտ կդառնա:
Միլիքյանը նաև նկատեց, որ եթե երկխոսության կողմերը գան ինչ-որ հանրագումարի, դա կհանգեցնի քաղաքական դաշտի խոշորացման. «Բոլոր մանր-մունր քաղաքական տզրուկ կուսակցությունները դուրս կմղվեն դաշտից, և դա դրական է: Մենք կարիք ունենք պատասխանատու, լուրջ քաղաքական ուժերի, դրանք մենք առայժմ չունենք, բայց այս պրոցեսը կարող է այդպիսի քաղաքական ուժեր ստեղծի»:
ԱԺ ՀՀԿ խմբակցության պատգամավոր Մկրտիչ Մինասյանն էլ շեշտեց, որ երկխոսությունն անհրաժեշտ է, և ինքը հույս ունի, որ այն ամեն դեպքում անպտուղ չի լինի. «Նույնիսկ եթե բոլոր հարցերում հնարավոր չլինի գալ ընդհանուր հայտարարի, ամեն դեպքում այն հանգամանքը, որ հակադիր բևեռներում գտնվող քաղաքական ուժերը միասին փորձում են բանավիճել և ընդհանուր խնդիրներ լուծել, արդեն դրական է»:
Մինասյանը նշեց, որ իրենք արտահերթ ընտրությունների մասին հարց չեն դրել, այլ գտնում են, որ ընտրությունների մասին խոսելն ու բանավիճելը կարևոր է:
