Հայաստանում Ուրուգվայի դեսպան Էդուարդո Ռոսենբրոկն ընդգծում է, որ Հայաստանն ու Ուրուգվայը իրականացնում են մի շարք քայլեր երկկողմ հարաբերություններն ավելի զարգացնելու ու ամրապնդելու ուղղությամբ:
Մայիսի 27-ին նշում լրանում է երկու երկրների միջև դիվանագիտական հարաբերությունների հաստատման 30-ամյակը:
«Արմենպրես»-ի հետ զրույցում Հայաստանում Ուրուգվայի դեսպան Էդուարդո Ռոսենբրոկը շեշտեց, որ Ուրուգվայը շատ կարևորում է երկու երկրների միջև հարաբերություները: «30 տարվա անխափան դիվանագիտական հարաբերությունները խոսում են նաև 30 տարվա ընկերության մասին»,- ասաց դեսպանը:
Նա նշեց, որ 2021 թվականի սեպտեմբերի 30-ին Հայաստանում Ուրուգվայի դեսպանատան բացումը պատմական իրադարձություն էր, քանի որ մինչ այդ Ուրուգվայը երբեք Հայաստանում քաղաքական ներկայացուցչություն չի ունեցել:
«Եվ ուրախությամբ պետք է նշեմ, որ մեր ընկերությունն էլ ավելի ամրապնդվելու է այս տարվա վերջին կամ հաջորդ տարվա սկզբին՝ Ուրուգվայում Հայաստանի դեսպանության երկար սպասված բացմամբ, ինչի շնորհիվ հիմք կդրվի էլ ավելի ամուր և երկարատև հարաբերությունների»,- ասաց Էդուարդո Ռոսենբրոկը:
Ուրուգվայն առաջինն է պաշտոնապես ճանաչել և դատապարտել Հայոց ցեղասպանությունը: Դեսպանն ընդգծում է, որ Ուրուգվայը, լինելով փոքր երկիր, բայց միաժամանակ ունենալով շատ մեծ և ակտիվ հայկական սփյուռք, որպես մարդասիրական ժեստ արել է այդ քայլը:
«Հայոց ցեղասպանությունը ընդունելը շատ կարևոր քայլ էր, և Ուրուգվայից շատ մեծ ջանքեր պահանջվեց դա անելու համար: Ուրուգվայը առաջինն էր, որը, կարելի է ասել, քայլ արեց, որպեսզի հիմք դրվի Հայոց ցեղասպանության ճանաչմանը և օրինակ ծառայեց մնացած երկրների համար: Մեր երկիրը հետագայում նույնպես շարունակելու է և ամեն կերպ աջակցելու է Ցեղասպանության ճանաչմանը»,- ասաց նա:
Երկու երկրների միջև դիվանագիտական հարաբերությունների հաստատման 30-ամյակին նվիրված միջոցառումների մեկնարկը տրվել է Հայոց ցեղասպանության թանգարան-ինստիտուտում:
Միջոցառման ընթացքում Ուրուգվայի հայ համայնքի կողմից Հայոց ցեղասպանության թանգարան-ինստիտուտին հանձնվեցին Հայոց պատմության, Հայ Դատի և Հայոց ցեղասպանության մասին մի շարք կարևոր նյութեր՝ ազդագրեր, թռուցիկներ, գրքեր:
Գայանե Գաբոյան
Լուսանկարները՝ Մխիթար Խաչատրյանի
