Սալոմե Զուրաբիշվիլին DW-ին տված հարցազրույցում խոսել է ԵՄ-ին և ՆԱՏՕ-ին Վրաստանի ինտեգրման կարևորության, Ուկրաինայում պատերազմի համար Արևմուտքի պատասխանատվության և ռուսական ագրեսիայի հաջորդ զոհը դառնալու սպառնալիքի մասին։
Ուկրաինայում Ռուսաստանի կողմից սանձազերծված պատերազմը ցավալի հիշողություններ բերեց Վրաստանում 2008 թվականի իրադարձությունների վերաբերյալ, երբ ռուսական բանակը ներխուժեց Վրաստանի տարածք։
Ռուսաստանի հետ հնգօրյա պատերազմում կրած պարտությունը հանգեցրեց նրան, որ Թբիլիսին կորցրեց վերահսկողությունը երկու շրջանների՝ Հարավային Օսիայի և Աբխազիայի նկատմամբ, որտեղ ռուսական զորքերի ներկայությունը պահպանվում է մինչ օրս: DW-ն զրուցել է Վրաստանի նախագահ Սալոմե Զուրաբիշվիլիի հետ այն մասին, թե ինչ է նշանակում Ուկրաինայի պատերազմը Վրաստանի համար, ինչու է Թբիլիսիի համար այդքան կարևոր՝ միանալ ՆԱՏՕ-ին և ԵՄ-ին, և արդյոք վրացիները վախենում են, որ իրենց երկիրը կարող է դառնալ ռուսական ագրեսիայի հաջորդ զոհը։
«Վրաստանում այս փուլում գերիշխող զգացումը ոչ թե վախն է, այլ համերաշխությունը։ Վրաստանի ժողովուրդն այժմ իսկապես իրեն նույնացնում է ներկայիս հարձակման զոհի հետ և հույսով է նայում Ուկրաինայի դիմադրությանը, այն միասնությանը, որով երկրին օգնում են Եվրոպայի և ԱՄՆ-ի իր գործընկերները: Մենք դրան հիացմունքով ենք նայում։ ՆԱՏՕ-ն Վրաստանին իսկապես համարում է ինտեգրացիոն քաղաքականության հաջողակներից մեկը։ Մեզ իսկապես անհրաժեշտ է ԵՄ-ի և ՆԱՏՕ-ի հետ ինտեգրման՝ ավելի արագ և հուսալի ուղի, և հենց այստեղ ենք տեսնում մեզ համար լիարժեք անվտանգության երաշխիքը: Այդ անվտանգությանը հնարավոր չէ հասնել ռազմական ճանապարհով, քանի որ մենք երբեք չենք կարող պատերազմում հաղթել Ռուսաստանին»,- նշել է Զուրաբիշվիլին։