Վերջին ամիսներին շինանյութի գների բարձրացում է նկատվում։ Նշվում է, որ մեկ «Զիլ» մակնիշով կապույտ ավազը հիմա վաճառում են 150 հազար դրամ, մինչդեռ նախորդ տարի 60 հազար դրամ էր. «Կապույտ ավազը, որը ամենաշատ օգտագործվողն է շինարարության մեջ, դարձավ մոնոպոլիա, մեքենան՝ 150.000 դրամ։ Միայն ML Minning։ Ուրիշ չկա»,-գրել է ֆեյսբուքի օգտատերերից մեկը։
Այս առնչությամբ, Շինարարների միության տնօրեն Գուրգեն Մինասյանը «Առաջին լրատվական»-ի հետ զրույցում նշեց, որ ընդհանրապես շինանյութերի շուկայում թանկացում է եղել, խոսքը միայն կապույտ ավազի մասին չէ. «Մենք դեռևս 6 ամիս առաջ, նախորդ տարվա աշնանը, շինանյութերի շուկայում գների բարձրացման հետ կապված առաջարկություն ենք ներկայացրել փոխվարչապետին: Կառավարությունն, ի դեմս, ֆինանսների նախարարության, մի քանի քննարկումներ արեց մեր ներկայացրած հաշվարկների հիման վրա, հավաքեց գերատեսչություններից իրենց ծրագրերով իրականացվող կառույցների մոտեցումները այդ հարցի վերաբերյալ և պատասխանեցին, որ այդ հարցը ներկայացված է կառավարություն՝ վերջնական որոշում կայացվի, բայց ինչ օրես արձագանք չենք ստացել: Մենք առաջարկել էինք, որ շինարարական ծրագրեր իրականացրած կազմակերպությունները, որոնք այդ թանկացումների հետ կապված ֆինանսական վնասներ են կրել, նրանց ֆինանսական փոխհատուցում տրվի»,-ասաց նա:
Հարցին, թե արդյոք որևէ կերպ իշխանությունների կողմից շինանյութերի շուկայում գնագոյացման առումով վերահսկողություն չի իրականացվում, Գուրգեն Մինասյանը պատասխանեց. «Շինանյութերի թանկացման արժեքներն ամեն ամիս հրապարակվում են ֆիննախի կայքում, որը հիմք է ծառայում շինարարության գնագոյացման նախահաշիվներ կազմելու համար: Բայց կան նախագծեր, որոնք կազմվել են 2 տարի առաջ, որտեղ շինանյութի արժեքները ցածր են եղել և այդ ծրագրերը մնացել են հին նախահաշվային արժեքներով: Ծրագրերն իրականացվել են թանկացած շինանյութերով, դրա համար ենք առաջարկել, որ ֆինանսական փոխհատուցում տրվի»:
Նա, համոզմունք հայտնեց, որ սա ազդեցություն է ունենում նաև բնակարանների ու տների գների վրա. «Եթե շինարարության արժեքը թանկանում է, բնական է, որ կառուցապատողն այդ թանկացումը պետք է ներառի վաճառվող բնակարանների գնի մեջ: Դրա համար էր անշարժ գույքը թանկացավ: Վերջին հաշվով դա բնակչության ջանից է դուրս գալիս, դա իրականացվում է գնորդների հաշվին»:
