«Իշխանությունը կավարտի ներկայացնել իր հակափաստարկները, որից հետո կսկսենք քննարկումները` կքննարկենք և միասին կհասկանանք, որտեղ կհասնենք ընդհանուր հայտարարի, որտեղ`ոչ, ու վերջնական արդյունքում մեր որոշումը կկայացնենք»,- «Առաջին լրատվականի» հետ զրույցում անդրադառնալով երկխոսության հետագա ընթացքին՝ նշեց ՀԱԿ պատվիրակության անդամ Ֆելիքս Խաչատրյանը:
Հարցին, թե հնարավո՞ր է, արդյոք, երկխոսության ժամկետների երկարաձգում՝ պայմանավորված քննարկման նյութի ծավալներով, Խաչատրյանը պատասխանեց, որ նման բան չի կարող լինել. «Երկարաձգում չի լինելու, դա արդեն որոշված է, և վերջնաժամկետը սեպտեմբերն է: Մենք սեպտեմբերի 9-ին հանրահավաք ունենք, և իմ կարծիքով այդ ժամանակ ամեն ինչ պարզ կլինի` և՛ իշխանության դիրքորոշումը, և՛ մեր դիրքորոշումն ու հետագա անելիքները»:
Ֆելիքս Խաչատրյանը ևս մեկ անգամ ընդգծեց, որ քննարկումները կարող են տևել մինչև սեպտեմբերի 9-ի հանրահավաքը, քանզի դրանից հետո դրանք շարունակելու իմաստ էլ չկա: Նրա խոսքերով, խնդիրը հիմնավորումներն ու փաստարկները ընդունելը կամ չընդունելն է. «Կքննարկենք, կհասկանանք, ընդունում են` լավ, չեն ընդունում, ուրեմն արդեն ամեն ինչ իր տեղը կընկնի»:
