Թուրքական Radikal թերթի փոխանցմամբ՝ ամերիկյան հեղինակավոր The New York Times թերթն իր հոդվածում անդրադարձել է Թուրքիայի մարմնավաճառների ու հասարակաց տների խնդրին։
Նշվում է, որ առանց համապատասխան թույլտվության Թուրքիայում մարմնավաճառությամբ զբաղվում է նվազագույնը 100,000 կին, որոնց միջին ամսական եկամուտը կազմում է 6000 դոլար։ Երկուշաբթի օրը՝ կեսօրից հետո հարյուրավոր թուրք տղամարդիկ միմյանցից 5 րոպեի ընդմիջումով գնում են Քադեմ փողոցը, ուր գտնվում է Ստամբուլի խոշորագույն հասարակաց տներից մեկը։ Մուտքի մոտ ոստիկանությունը զննում է նրանց և նոր թողնում ներս։
«Հիմնական ծառայությունն» արժե 35 լիրա (գրեթե 20 դոլար), որից 20 լիրան (11 դոլար) տեղի վարձն է, իսկ մնացածը՝ մարմնավաճառինը։ Բայց եթե հաճախորդը ցանկանում է, որ մարմնավաճառն իրեն քնքուշ խոսքեր ասի, համբուրի, ապա նա պետք է վճարի հավելյալ 15-20 լիրա, այլապես՝ նա սեքսից բացի, ոչ մի այլ բան չի ստանա։
Ամերիկյան թերթի տվյալներով՝ Ստամբուլի Բեյօղլու թաղամասում, որտեղ գտնվում է նաև Քադեմ փողոցը, մարմնավաճառությունը սկսեց զարգացում ապրել 1970-ական թվականներից։ Այստեղ հասարակաց տների կայսրություն հիմնեց պոլսահայ գործարար Մաթիլդ Մանուկյանը (1914-2001), ում տարեկան շահույթը կազմում է 4 միլիոն դոլար։
Հիշեցնենք, որ Մաթիլդ Մանուկյանը (1914-2001) Թուրքիայում ունեցել է 37 հասարակաց տուն և վճարած հարկերի ցուցանիշով 6 անգամ ռեկորդ է գրանցել, ինչի համար տարբեր պարգևների է արժանացել պետության կողմից։
