Ֆրանսիական բանակը տեսանկարահանել է, թե ինչպես են ռուս վարձկանները դիակներ թաղում Մալիի ռազմաբազայի մոտ, որպեսզի մեղադրեն ֆրանսիական ուժերին՝ զանգվածային գերեզմաններ կազմակերպելու մեջ։ Այդ մասին գրել է ֆրանսիական AFP լրատվական գործակալությունը՝ ապրիլի 21-ին։ Գործակալության կողմից ձեռք բերված անօդաչու սարքերի կադրերը ցույց են տալիս, թե ինչպես են կովկասյան արտաքինով զինվորականները մարմինները լցնում Մալիի հյուսիսում գտնվող Գոսի բազայի մոտ փոսում։
Ենթադրյալ զանգվածային գերեզմանի նկարները նախկինում տեղադրվել էին Դիա Դիարա անունով տղամարդու Twitter-ի օգտահաշվում, ով իրեն բնութագրում է որպես «նախկին զինվոր» և «մալիացի հայրենասեր»։ Նա դրանք ուղեկցել է մեկնաբանությամբ. «Ահա թե ինչ թողեցին ֆրանսիացիները, երբ նրանք լքեցին Գոսսիի բազան… Մենք չենք կարող լռել այս մասին»: Ֆրանսիայի գլխավոր շտաբը Twitter-ում հրապարակված տեսանյութն անվանել է «տեղեկատվական հարձակում» և հայտնել, որ Դիա Դիարայի պրոֆիլը կեղծ օգտահաշիվ է, որը ստեղծվել է ռուսական մասնավոր ռազմական ընկերության՝ «Վագների»-ի կողմից։
«Բարխան առաքելությունը վարկաբեկելու այս մանևրը համակարգված է: Այն արտացոլում է բազմաթիվ տեղեկատվական հարձակումները, որոնց ենթարկվել են ֆրանսիացի զինվորները՝ մի քանի ամիս շարունակ», – ասված է շտաբի հայտարարության մեջ:
