Երեկ Ֆեյսբուք սոցիալական ցանցը հայտարարել է գործարկվելիք մի շարք փոփոխությունների մասին, որոնք հիմնականում վերաբերում են գաղտնիության կարգավորումներին:
Մասնավորապես, եթե առաջ որևէ մեկը կարող էր պիտակել իր ընկերներից յուրաքանչյուրին այս կամ այն նկարի կամ գրառման մեջ, ապա այժմ պիտակը (tag) կհրապարակվի միայն տվյալ օգտատիրոջ հաստատումից հետո: Ընդ որում, այժմ կարելի է պիտակել ոչ միայն ֆեյսբուքյան ընկերներին, այլև մարդկանց, ում ճանաչում եք, բայց այս կամ այն պատճառով չեք ցանկանում ընկերանալ այս սոցիալական ցանցում (օրինակ` ձեր ղեկավարին, ում հետ նկարվել եք որևէ կորպորատիվ խնջույքի ժամանակ): Նկարները վերբեռնած օգտատերը նույնպես պետք է նախապես հաստատի այլոց կողմից արված պիտակները մինչ դրանց հրապարակային դառնալը:
Հաջորդ խոշոր փոփոխությունը վերաբերում է Վայրեր (Places) ֆունկցիային: Եթե մինչ այժմ դուք կարող էիք նշել ձեր գտնվելու վայրը (ռեստորան, բար կամ հյուրանոց)` բացառապես սմարթֆոնով, ապա այժմ ցանկացած սարքից ֆեյսբուք մուտք գործելիս կկարողանաք նշել ձեր վայրը ցանկացած տիպի գրառման կամ այլ հրապարակման մեջ` պիտակի տեսքով:
Բացի այդ, եթե նախկինում այս կամ այն գրառման հրապարակայնության աստիճանը (տեսանելի է բոլորին կամ միայն ընկերներին) կարելի էր սահմանել միայն ամենասկզբում, ապա այժմ դա կարելի է անել նաև հրապարակելուց հետո:
Ըստ Ֆեյսբուքի պաշտոնական էջի` այս փոփոխությունները ցանցում կներդրվեն առաջիկա օրերին, և յուրաքանչյուր օգտատիրոջը «հասնելուց» հետո նրան կառաջարկվի ուղեցույցով մանրակրկիտ ծանոթանալ թվարկված և մի քանի այլ փոփոխություններին:
