Թուրքական Radikal թերթի փոխանցմամբ՝ Թուրքիայում ահաբեկչական հռչակված ու արգելված «Քրդստանի աշխատավորական կուսակցության» (PKK) զինյալները երեկ երեկոյան ժամը 20.45-ին երկրի արևելյան հատվածում ընկած Էլազըղի նահանգի Ալաջաքքայայի շրջանում հրթիռներով ու երկարափող զենքերով գնդակոծել են շրջանի վարչակազմի ու անվտանգության ծառայության շենքը։ Դրա արդյունքում վիրավորվել է 2 ոստիկան և 1 պետծառայող (կին)։
Իսկ երկրի հարավարևելյան հատվածում գտնվող Հաքքարի նահանգի Շեմդինլիի շրջանում, որը սահմանակից է Հյուսիսային Իրաքին, մի խումբ PKK-ականներ երեկ ժամը 19.00-ին երկարափող զենքերով ուժեղ կրակ են բացել պարեկություն կատարող ժանդարմերիայի զինծառայողների վրա, ինչից հետո նահանջել են մոտակա անտառ։ Զոհերի ու վիրավորների մասին դեռևս ոչինչ չի նշվում։
Բիթլիսի նահանգի Դատվանի շրջանում էլ PKK-ականները երեկ ժամը 21.30-ին առևանգել են բջջային հեռախոսների ոլորտի 5 աշխատակիցների։ PKK-ականներն այրել են նրանց պատկանող երեք ավտոմեքենա և պահանջել 100,000 դոլարի փրկագին։
Հիշեցնենք, որ PKK-ն հիմնադրվել է 1978 թվականին՝ քուրդ առաջնորդ Աբդուլլահ Օջալանի կողմից, ով 1999 թվականից ցմահ ազատազրկում է կրում Մարմարա ծովի Իմրալը կղզում։ PKK-ի ընդլայնված զինված պայքարը Թուրքիայում սկսվել է 1984 թվականին, ինչի արդյունքում երկու կողմից զոհվել է 40-45,000 մարդ:
