«Առաջին լրատվական»-ի զրուցակիցն է Արցախի խորհրդարանի արտաքին հարաբերությունների մշտական հանձնաժողովի նախագահ Վահրամ Բալայանը։
-Պարոն Բալայան, հրապարակվել է Արցախի «Բռնազավթված տարածքների մասին» օրենքի նախագիծը։ Այն սահմանում է 1991-1994 և 2016 թվականներին Ադրբեջանի Հանրապետության և 2020 թվականին Թուրքիայի Հանրապետության և օտարերկրյա զինյալ ահաբեկիչների անմիջական մասնակցությամբ Ադրբեջանի Հանրապետության կողմից Արցախի Հանրապետության դեմ իրականացված ռազմական ագրեսիայի հետևանքով բռնազավթված տարածքների իրավական կարգավիճակի։ Ձեր կարծիքով այս փուլում նախագծի ընդունումը գործնական իմաստով ի՞նչ կտա։
–Նախևառաջ պետք է նշել, որ շատ կարևոր է ճշգրտել այդ տարածքների իրավական կարգավիճակը։ Օրենքի նպատակը մեծ հաշվով սա է։ Դա պետք է հիմք հանդիսանա, որ հետագայում այդ ուղղությամբ միջազգային կառույցների, երկրների ու կազմակերպությունների հետ աշխատանք իրականացվի, նաև փորձենք Արցախի Հանրապետության ինքնորոշման իրավունքը պաշտպանել միջազգային ատյաններում։ Մյուս կողմից էլ՝ տեր լինենք այն տարածքներին, որոնք այսօր բռնազավթված են Ադրբեջանի կողմից։
-Ձեր դիտարկմամբ Բաքվի արձագանքը սրան ինչպիսի՞ն կլինի։
-Հասկանալի է, որ ադրբեջանական կողմի արձագանքը վատ կլինի, այս ամենին դրական վերաբերմունք չի լինի։
-Իսկ ռիսկերը հաշվարկվե՞լ են։
–Իհարկե հաշվարկվել են այն տեսանկյունից, որ վերջիվերջո կան փաստեր, որոնք չենք կարող շրջանցել։ Չենք կարող նաև կոչ եկած վիճակում մեր իրավունքները պաշտպանել։ Պետք է գնանք այս ճանապարհով ու փորձենք պաշտպանել մեր երկրի ու ժողովրդի շահերը։
-Նախագծում տեղ են գտել Արդբեջանին անցած 7 շրջանները նույնպե՞ս, թե՞ միայն Շուշին ու Հադրութը։
-Բոլորը, այսինքն՝ այն բոլոր տարածքները, որոնք սահմանադրությամբ նախատեսված են և որոնք կան «Լեռնային Ղարաբաղի Հանրապետության վարչատարածքային բաժանման մասին» օրենքում։
-Իսկ այս դեպքում ռուսական կողմի արձագանքն ինչպիսի՞ն կլինի, եթե նկատի ունենանք, որ Մոսկվան դեմ չէր այդ 7 շրջանների հանձնմանը։
-Չեմ կարող ասել ինչ արձագանք կլինի, կյանքը ցույց կտա։
