Երեք հազար ամերիկացի զինվորականներ են այժմ տեղակայվում Ռումինիայի, Լեհաստանի և Գերմանիայի տարբեր հատվածներում՝ ի պատասխան Ռուսաստանի կողմից Ուկրաինայի սահմանների երկայնքով զորքերի շարունակական կուտակման:
Զորքերի մեծ մասը ներկայացնում է Հյուսիսային Կարոլինայի Ֆորտ Բրեգից Լեհաստան տեղափոխված 82-րդ օդադեսանտային ստորաբաժանումը: Մոտ 300 զինծառայող 18-րդ օդադեսանտային կորպուսից, որը նույնպես տեղակայված է Ֆորտ Բրեգում, կմեկնի Գերմանիա: Արդեն Եվրոպայում գտնվող հազար զինվորականներ Գերմանիայից կտեղափոխվեն Ռումինիա։ Ինչպես Պենտագոնի մամլո քարտուղար Ջոն Քիրբին է ասել, սրանք մշտական տեղաշարժեր չեն եւ նախատեսված են միայն անվտանգության ներկա պայմաններին արձագանքելու համար:
Ավելի քան 8000 զինվորականներ ներկա պահին գտնվում են բարձր պատրաստության վիճակում, և Քիրբին հայտարարում է, որ շուտով կարող են լինել լրացուցիչ տեղակայումներ: ‘’Մենք նաև չենք բացառում, որ ԱՄՆ-ից լրացուցիչ ուժեր կարող են տեղակայվել Եվրոպայում’’, ասել է նա:
Փոքր թվով ամերիկացի զինվորականներ են գտնվում նաեւ Ուկրաինայում, որտեղ իրականացնում են վերապատրաստման մարզումներ: Հիշեցնենք, որ այդ ծրագիրն ԱՄՆ-ը սկսեց Ուկրաինայում կիրառել, երբ Ռուսաստանը 2014 թվականին Ղրիմնը բռնակցեց իրեն:
Երեքշաբթի օրը Քիրբին «Ամերիկայի Ձայն»-ին տված հարցազրույցում ասել է, որ ԱՄՆ-ի պաշտպանության նախարար Լլոյդ Օսթինը այս ամսվա վերջին կմեկնի Բրյուսել՝ հանդիպելու ՆԱՏՕ-ի պաշտպանության նախարարների հետ:
Ռուսաստանը շարունակ հերքում է, Ուկրաինայի սահմանի երկայնքով զորքեր տեղակայելով, ռազմական ներխուժում իրականացնելու ծրագիր ունենալու Արեւմուտքի պնդումները: Մոսկվան հայտարարում է, թե զորքերն այստեղ պարզապես իրականացնում են զորավարժություններ:
Իսկ վերջին տվյալների համաձայն, Ռուսաստանն Ուկրաինայի սահմանների երկայնքով շարունակում է մեծացնել զորքերի կուտակումները, որոնց թիվն այսօր, ըստ որոշ հաշվարկների, հասել է 130 հազարի: