Business-Грузия-ի փոխանցմամբ՝ Վրաստանը կոշտացրել է ավտոտրանսպորտի նկատմամբ պահանջները։ Ուղևորատար ավտոտրանսպորտային միջոցների նկատմամբ կներդրվեն մի շարք սահմանափակումներ։
Նոր կանոնների համաձայն՝ Վրաստանում երթևեկելու իրավունք կունենան միայն այն ավտոբուսները, որոնց տարիքը չի գերազանցում 20 տարին։ Հետագայում այդ ժամկետը նվազեցվելու է մինչև 15 տարի։ Նոր չափորոշիչների ներդրմամբ զբաղվում է Վրաստանի տրանսպորտի ու էկոնոմիկայի նախարարությունը։
Նշվում է, որ այս ամենը միտված է ուղևորների իրավունքների պաշտպանվածությանը և առավելագույն անվտանգ երթևեկման ապահովմանը։ Օրենսդրական այս նոր նախաձեռնությունը խորհրդարանի քննարկմանն ու հաստատմանը կներկայացվի աշնանը։
Նոր նախաձեռնության պատճառը վերջին շրջանում Վրաստանում ուղևորատար ավտոտրանսպորտային միջոցների վթարների հաճախակիացումն է։ Վերջին դեպքը տեղի է ունեցել երկու օր առաջ, երբ Գուդաուրիի շրջանում վթարի ենթարկվեց հայ և ադրբեջանցի զբոսաշրջիկներ փոխադրող ավտոբուսը՝ գլորվելով 15 մետրանոց հեղեղատի մեջ։ Վթարի արդյունքում զոհեր չեն գրանցվել, սակայն 27 մարդ ստացել է տարբեր աստիճանի մարմնական վնասվածքներ։
