Վերջերս կատարված հետազոտությունների համաձայն՝ վերջին 20 տարում ծնված երիտասարդները նոր հոգեբանական առանձնահատկություններ ունեն, զգալի տարբերություն կա նրանց և անցումային, անգամ խորհրդային տարիների սերունդների միջև: Այս մասին այսօր լրագրողների հետ հանդիպմանն ասաց ՀՀ սփյուռքի նախարարության համահայկական ծրագրերի վարչության պետ Ատոմ Մխիթարյանը:
Նրա խոսքով՝ ներկայիս երիտասարդությունն ավելի բաց է՝ մտածողության և նախաձեռնության առումով: Վերջին 10 տարիներին երիտասարդների մասնակցությունը հասարակական քաղաքական կյանքին մեծացել է, նրանք ընդգրկվել են ոչ ֆորմալ խմբերում: Խոսելով Հայաստանի և սփյուռքի երիտասարդների տարբերության մասին՝ Մխիթարյանը նշեց, որ հիմա սփյուռքում հայերը իրենց ավելի շատ են հայ զգում, քան հայաստանաբնակները: Կրթություն ստանալու համար, ըստ նրա, մեր երիտասարդները ձգտում են գնալ Հայաստանից, իսկ սփյուռքահայերի դեպքում հակառակն է: Մխիթարյանը վտանգավոր համարեց սփյուռքահայերի շրջանում խառնամուսնությունների թվի մեծացումը:
«Երիտասարդության ամենագլխավոր խնդիրը մեզանում հասարակությանն ինտեգրվելն է, նրա առջև ծառացած են բազմաթիվ խնդիրներ որոնց մեծ մասը պատկանում է ընդմիշտ գոյություն ունեցող խնդիրների թվին»,- ասաց ԵՊՀ ընդհանուր հոգեբանության ամբիոնի վարիչ Հրանտ Ավանեսյանը: Նրա խոսքով՝ ներկայումս երիտասարդությանը կարող ենք դիտարկել երկու բևեռից, մեկն այն է, որ երիտասարդությունը մեր հասարակության ակտիվ շերտն է, ապագան. մյուսը, որ կարող ենք շատ վատ բաներ լսել նրա մասին:
Հոգեբանը դրական համարեց այն, որ մեզանում գոյություն չունի զուտ մշակույթի խնդիր, ինչը սուր է դրված արտերկրում, և դա պայմանավորված է էթնոհոգեբանական առանձնահատկություններով: «Մեր դոմինանտ մշակույթը մեզ պաշտպանում է»,- ասաց նա:
