Մաշկաբան-սեռավարակաբան Կարեն Վարդանյանը այսօր խոսեց ամառային հանգստի տհաճ հետևանքներից: Ըստ նրա՝ մի շարք մաշկային և սեռական հիվանդություններ լինում են հենց ամառային հանգստից հետո: Ամենատարածվածը բնության գրկում հանգստացողների շրջանում է, որը առաջանում է միջատների խայթոցից և հղի է լուրջ հետևանքներով: Երկրորդը արևայրուքից մինչև արևային այրվածքն է, երրորդը հիմնականում մանկական օրգանիզմին վնասող իմունային համակարգի փոփոխությունը, որը առաջանում է կլիմայի, սննդի փոփոխությունից, և նաև՝ քիթ-շրթունքային հերպեսը:
Բացի այդ, մաշկաբանի խոսքերով, հյուրանոցի աստղերի քանակից և սպասարկման որակից կախված՝ կարող են հանգստացողները մի շարք մաշկային հիվանդություններ ձեռք բերել: Կասկածներ չկան, որ սպիտակեղենը լվացվում է, բայց մի շարք հարուցիչներ բավական կայուն են քիմիական լվացող միջոցների նկատմամբ, ինչի արդյունքում սպիտակեղենից մարդուն է փոխանցվում քոս և մի շարք այլ մաշկային հիվանդություններ:
Ինչ վերաբերում է սեռական վարակներին, Կարեն Վարդանյանը նշեց, որ ամառային հանգիստն ասոցացվում է ցոփ ու շվայտ կյանքի հետ՝ խմիչքի չարաշահում, որը նպաստում էսեռական ցանկության ուժգնացմանը, բացի այդ՝ դժվար է պատկերացնել մի լողափ, որտեղ չլինեն կիսամերկ, առնական տեսքով տղամարդիկ և գեղեցիկ, հաճելի արտաքինով կանայք: Վարդանյանի փոխանցմամբ՝ լողափերում լինում են նաև կոմերցիոն սեքսով զբաղվող թե՛ կանայք, թե՛ տղամարդիկ, որոնց հետ շփումը շատ հաճախ հանգեցնում է սեռական հիվանդությունների տարածմանը:
Ըստ Կարապետյանի՝ նման դեպքերում մարդիկ բժշկին դիմում են սեպտեմբերի կեսերից, քանի որ հանգստանալիս շատ գումարներ են ծախսում, և ֆինանսկան միջոցները պետք է վերականգնեն և նոր դիմեն: Հիվանդների 60 տոկոսը տղամարդիկ են, 40-ը՝ կանայք:
Վարդանյանն ամառային հանգիստն ավարտած քաղաքացիներին խորհուրդ տվեց մաշկի, եղունգների, մազերի պրոբլեմներ ունենալու դեպքում դիմել բժշկի, իսկ նոր հանգստի մեկնելու պատրաստվողներին՝ անհրաժեշտ պարագաներից զատ, վերցնել արևից պաշտպանող և խոնավեցնող քսուքներ: Սպիտակ մաշկ ունեցողներին և երեխաներին խորհուրդ տվեց երեք օր մնալ ստվերում:
