Աշխարհում առկա «օֆշորային» սև գոտիները հետզհետե «սպիտակում» են: «Օֆշորային» գոտիներում գրանցված ընկերությունների մասին տեղեկությունները փակ են: Վերջերս այդպիսի գոտուց դուրս գալու մասին հայտարարել է Կիպրոսը:
«Առաջին լրատվական»-ի հետ զրույցում մակրոտնտեսության փորձագետ Հովհաննես Իգիթյանը նշեց, որ «օֆշորային» գոտուց դուրս գալու հիմնական խթանը Եվրամիությանն անդամակցելու հեռանկարն է. «Եվրամիության պահանջն է, որ ԵՄ անդամ դառնալ հավակնող երկիրը պետք է լինի ընդհանուր ֆինանսական և վերահսկողության դաշտում: Այսօր Երվրոպայում ֆինանսական աղբյուրների մաքրությունն առաջնահերթ խնդիր է: Եվրոպական հանձնաժողովը փորձում է կոորդինացնել և պարզ է, որ անհնարէ ունենալ մի ֆինանսական երկիր, հատկապես որ այն կարող է գործել եվրոյի գոտում: Դա փողի լվացման մեծ հնարավորություն է տալիս»:
Հ. Իգիթյանի խոսքով՝ այդ պատճառով Կիպրոսը, նախկինում նաև Մերձբալթյան երկրները, Լիխտենշտեյնը, Մոնակոն, դառնալով ԵՄ անդամ, պարտավորված են գործել նույն խաղի կանոններով, նույն ստանդարտներով՝ ինչպես ամբողջ ԵՄ-ում:
Հ. Իգիթյանը նշեց, որ նախկինում փորձեր արվել են Հայաստանում «օֆշորային» գոտի ստեղծելու ուղղությամբ, երբ իտալական տեքստիլ մի կազմակերպություն Չարենցավանում բացել էր մասնաճյուղ՝ արտադրելու և արտադրանքը փոխանցելու նպատակով. «Դա ոչ թե ֆինանսական, այլ արտադրական «օֆշորի» մասին էր խոսքը»:
Ընդհանրապես, ըստ Հ. Իգիթյանի, Հայաստանը բիզնեսի համար՝ թե՛ գրանցվելու, թե՛ գործունեություն ծավալելու տեսակետից, ամենաբարենպաստ երկիրը չէ՝ կապված քաղաքական, տնտեսական, նաև տրանսպորտային, հարկային քաղաքականության հետ:
Նշենք, որ «օֆշորային» գոտում հիմնականում գրանցվում են հարկային պատասխանատվությունից խուսափող կազմակերպությունները: ՀՀ-ում հարկային արտոնություններից օգտվող ընկերությունների կեսը գրանցված է «օֆշորային» գոտիներում: Դեռ 2007 թ. ՀՀ վարչապետ Տիգրան Սարգսյանը ռուսական պարբերականին տված հարցազրույցում հայտարարել էր, թե «մենք ինքներս մեզ դիտարկում ենք որպես «օֆշորային» գոտի»:
