Պաշտոնական Բաքուն շարունակում է բանակաշինության գործընթացը և ամենաժամանակակից սպառազինության գնումները: Այս մասին հայտարարել է Ադրբեջանի նախագահ Իլհամ Ալիևը Հադրութում զորամասի բացմանը: «Ռազմատենիկայի գնումները, ռազմական ծախսերի ավելացումը, ինչպես նաև զինծառայողների աշխատավարձերի բարձրացումը, այդ ամենը, բնականաբար, ցույց է տալիս, որ եթե անգամ պատերազմն ավարտվել է, ապա բանակաշինության գործընթացը չի ավարտվել: Ընդհակառակը, պատերազմի փորձը մեզ ցույց տվեց՝ որոնք են մեր ուժեղ և թույլ կողմերը: Պատերազմի ժամանակ մենք ունեցել ենք ոչ շատ թերություններ, բայց դրանք եղել են: Ուստի պատերազմը մեզ համար անգին փորձ էր»,- ասել է Ալիևը: Նա հավելել է, որ այս պահին կյանքի են կոչվում պատերազմից հետո ստորագրված նոր պայմանագրերը: «Նոր պայմանագրերի հիման վրա արդեն Ադրբեջան է գալիս ամենաժամանակակից սպառազինություն և տեխնիկա մեր բանակի համար»,- ասել է Ալիևը: Նա նաև նշել է, որ նոր սպառազինությանը զուգահեռ ստեղծվում են նաև նոր զորամիավորումներ, մասնավորապես Ադրբեջանի զինված ուժերում սկսվել է կոմանդո ջոկատի ձևավորումը:
«Հադրութի զորամասում տեղակայված են նոր զորամիավորումներ՝ կոմանդոյի ուժերը: Կոմանդո ուժերի ստեղծումը մեզ համար նորարարություն է,- ասել է Ալիևը՝ հավելելով, որ դրանք պատրաստ կլինին իրականացնել ցանկացած ռազմական առաջադրանք:- Այդ ջոկատներում կծառայեն լավ պատրաստված անձիք, որոնք պատրաստ կլինեն իրենց կյանքը զոհել հանուն հայրենիքի: Դա զգալիորեն կավելացնի մեր բանակի ռազմական հզորությունը: Ալիևը հավելել է, որ «այդպիսի ջոկատներ շատ կլինեն»:
Ռազմաքաղաքական հարցերով վերլուծաբան Դավիթ Հարությունովի կարծիքով՝ Ալիևի հայտարարությունները ոչ միայն քարոզչական բնույթ ունեն, Բաքուն բանակաշինության հարցում հստակ քաղաքականություն է վարում․«Խոսքը ոչ միայն Իսրայելից անօդաչուներ, այլ նաև Պակիստանից ինքանթիռներ գնելու մասին է, այլ գործարքներ ևս կան և դրա մասին առկա է հստակ տեղեկատվություն։ Այսինքն՝ Բաքուն շարունակում է ուժային լծակները բավականին ակտիվ օգտագործել»։
Վերլուծաբանի դիտարկմամբ՝ կարող են լինել տարբերություններ, ինչ-ինչ պատճառներով հարձակումները լայնածավալ բնույթ չկրեն, բայց մոտիվացիան նույնն է․ «Իմ ասածն էլ չի ենթադրում, որ ապագայում նման հարձակումներ տեղի չեն ունենա։ Այս փուլում կիրառվում է լոկալ հարձակումների տարբերակը։ Այսինքն՝ եթե իրենք կիրառում են, գործիքները նաև պետք է զարգացնեն»,-«Առաջին լրատվական»-ի հետ զրույցում ասաց նա։
Ըստ մեր զրուցակցի՝ լայնածավալ պատերազմական գործողություններին այժմ խանգարում է Ռուսաստանի ներկայությունը․«Բայց որպեսզի հասնեն որոշակի խնդիրների լուծմանը, որն այսօր Բաքուն իր առաջ դնում է՝ միջանցք, սահմանազատում, խաղաղության պայմանագիր՝ այդ երկիրը շարունակելու է գործադրել ռազմական ճնշումներ։ Առայժմ կիրառվում է լոկալ միջադեպերի ճանապարհով, այսինքն՝ ցավոք սրտի հավանականությունը մեծ է, որ առնվազն այսպես էլ կշարունակվի»,-եզրափակեց նա։
