Դեկտեմբերի 15-ին կայացած ԵՄ Արևելյան գործընկերության գագաթնաժողովի արդյունքներով ընդունվել է համատեղ հռչակագիր, որի համաձայնեցման բավականին բարդ գործընթացում տարված աշխատանքների արդյունքում հայկական կողմին հաջողվել է ապահովել փաստաթղթի վերջնական տարբերակում Հայաստանի համար կարևորություն ունեցող ձևակերպումների ներառումը։
Առաջին հերթին, մի շարք ձևակերպումներ անմիջականորեն վերաբերում են Լեռնային Ղարաբաղի հակամարտության կարգավորման գործընթացին:
Այսպես, փաստաթղթում շեշտադրվում է Արևելյան գործընկերության տարածաշրջանում չհանգուցալուծված հակամարտությունների կարգավորմանն ուղղված ջանքերի գործադրման անհրաժեշտությունը՝ միջազգային սկզբունքներին և նորմերին համահունչ: Իսկ ինչպես հայտնի է, ԼՂ հակամարտության կարգավորման հիմքում դրված միջազգային իրավունքի սկզբունքներն են ժողովուրդների իրավահավասարությունն ու ինքնորոշումը, տարածքային ամբողջականությունը և ուժի կամ ուժի սպառնալիքի չկիրառումը:
Գագաթնաժողովի հռչակագրում կարևորվում է նաև Եվրոպական Միության աջակցությունը հակամարտությունների կանխարգելման, կարգավորման և վստահության ամրապնդման համատեքստում գոյություն ունեցող համաձայնեցված բանակցային ձևաչափերին և գործընթացներին, հետևաբար նաև՝ ԵԱՀԿ Մինսկի խմբի համանախագահությանը։
Բացի այդ, համատեղ հռչակագրում անդրադարձ է կատարվում ռազմատենչ հռետորաբանությունից և սադրիչ գործողություններից խուսափելու նպատակով գործընկեր երկրների կողմից ջանքերի գործադրմանը և հակամարտություններից տուժած բնակչությանն աջակցության ամրապնդմանը։
Նշենք նաև, որ նաև Հայաստանի ջանքերի շնորհիվ Բելառուսին վերաբերող 11-րդ պարբերությունը հռչակագրում գրանցվել է ոչ թե ԵՄ և գործընկեր պետությունների, այլ միայն Եվրոպական Միության անունից:
Վերջապես, համատեղ հռչակագրում ողջունվում է ՀՀ-ԵՄ Համապարփակ և ընդլայնված գործընկերության համաձայնագրի ուժի մեջ մտնելը և խրախուսվում վերջինիս ամբողջական կիրարկումը, ինչն իր հերթին կհանգեցնի գործընկերության նոր մակարդակի հաստատմանը։
Հայաստանի և գործընկեր երկրների հետ բազմաշերտ համագործակցության հետագա ընդլայնման համատեքստում համատեղ հռչակագրում հանգամանալից անդրադարձ է կատարվում «Վերականգնում, դիմակայունություն և բարեփոխում. Արևելյան գործընկերության առաջնահերթությունները 2020 թվականից հետո» համատեղ աշխատանքային փաստաթղթում ամրագրված Տնտեսական և ներդրումային հավակնոտ ծրագրին, ինչպես նաև ողջունվում է «Հորիզոն Եվրոպա» հետազոտությունների և նորարարության շրջանակային ծրագրին Հայաստանի մասնակցության մասին համաձայնագրի կնքումը։