Նախօրեին կայացած ՏԻՄ ընտրություններին Գեղարքունիքի մարզի Սեմյոնովկա և Ծովագյուղ համայնքները չեն մասնակցել ընտրություններին, քանի որ այս համայնքների բնակիչները դեմ են Սևան խոշորացված համայնքի կազմում իրենց համայնքներն ընդգրկելուն: Ծովագյուղ համայնքի ՀՀԿ-ական ղեկավար Վահրամ Գևորգյանը «Առաջին լրատվական»-ի հետ զրույցում նշեց, որ քաղաքական ուժերը, որոնք մասնակցում էին այս ընտրություններին, իրենց համայնք քարոզարշավի չեն եկել, չեն փորձել համոզել ծովագյուղցիներին: Նրա խոսքով՝ սա քաղաքական ընտրություն չէ, որ տարբեր քաղաքական ուժերի համակիրներ ձայն տան իրենց թիմին. «Ծովագյուղում ընտրությունները միշտ քաղաքական չեն եղել»,-հավելեց նա: Հարցին՝ հետագայում ի՞նչ քայլեր եք անելու, քանի որ այդուհանդերձ Ծովագյուղ համայնքն ընդգրկվել է խոշորացված Սևան համայնքի կազմում, համայնքի երբեմնի ղեկավարը նշեց. «Մեզ անելու բան չի մնացել, արդեն կառավարության անելիքն է մնացել, հուսով ենք, որ լավ կլինի: Մենք ոչինչ չենք անի, կառավարությունն իր դիրքորոշումը կհայտնի: Պատերազմական վիճակ չի, որ ինչ-որ բանի պետք է հասնենք»:
Համայնքը 3 հազար ընտրող ունի: Որքան էլ աննախադեպ է իրավիճակը, երբ համայնքները չեմ մասնակցում ընտրություններին, այնուամենայնիվ, նրանք քայլը որևէ կերպ չի ազդում ընտրությունների արդյունքների վրա:
Վահրամ Գևորգյանը ակնհայտորեն նեղսրտած էր ստեղծված իրավիճակից, կորցնում է աթոռը, տրամադրություն չունի խոսելու, անցնում է վիրավորանքներին: Համայնքն ակնհայտորեն պետք է ազատել հանրապետական անկիրթ ղեկավարից:
Իր հերթին Սեմյոնովկա գյուղի վարչական ղեկավար Դավիթ Մնացականյանը «Առաջին լրատվական»-ի հետ զրույցում նշեց, որ իրենք իրենց քայլն արել են, մնացածը կառավարության որոշելիքն է. «Սա իմ որոշելու բանը չի, կառավարությունը կորոշի, համայնքը ոնց կորոշի, որտեղ համայքն, այնտեղ ես»:
Նա հավելեց, որ ի տարբերություն Ծովագյուղի, իրենցը փոքր համայնք է: Հարցին, թե ո՞րն էր բոյկոտի պատճառը, արդյոք բնակիչները հիասթափված են կառավարության գործունեությունից, Մնացականյանը պատասխանեց. «Սա ժողովրդի ցանկությունն էր, եթե հիասթափված չլինեին, գոնե 200 հոգուց մեկը չէր գնա՞ ընտրության, ուրեմն հիասթափված են եղել որ այդ ձև է եղել»: