«Մենք խիստ անհամաձայնություն ենք հայտնում այդ որոշմանը և հայտարարում, որ գործարարները կնախաձեռնեն հակազդեցության քայլեր։ 50 հազար աշխատատեղ ապահովող ռեստորանային ոլորտը գտնվում է շատ ծանր տնտեսական իրավիճակում և չի պատրաստվում ընդունել ոլորտի համար խիստ վտանգավոր որոշումները։ Մեկ անգամ ևս կոչ ենք անում պատասխանատու գերատեսչություններին զերծ մնալ այս գործարար ոլորտում անհիմն միջամտություն կատարելուց»,-«Առաջին լրատվական»-ի հետ զրույցում վերահաստատեց իրենց կտրուկ դիրքորոշումը «Ռեստորանների Ասոցիացիա» ՀԿ-ի տնօրեն Արեգ Բարսեղյանը։
Հիշեցնենք, որ օրերս Առողջապահության նախարար Անահիտ Ավանեսյանը հայտարարել էր, որ հունվարի 1-ից սննդի, խնջույքի, ժամանցի և մշակութային վայրեր մուտք գործելու համար անհրաժեշտ է լինելու ՊՇՌ բացասական թեստ կամ պատվաստումը հաստատող հավաստագիր։ Արեգ Բարսեղյանն իրենց կոշտ արձագանքը բացատրեց այն հիմնավորումներով, որ Առողջապահության նախարարությունը այդպիսի որոշում կայացնելիս հաշվի չի առել, որ պետական մարմիններից և ոչ մեկը՝ Ֆինանսների նախարարությունը, ՊԵԿ-ը, երաշխիք չի տալիս, որ կփոխհատուցի ռեստորանային բիզնեսի վնասները, կկարողանա ապահովել տնտեսական և սոցիալական այնպիսի պայմաններ, որպեսզի ոլորտի գործունեությունը վերջնականապես անկում չապրի։
Մեր զրուցակիցը կարծում է, որ ռեստորանային բիզնեսը այս գնաճի, նվազ եկամուտների պայմաններում արդեն իսկ տնտեսական ծանր իրավիճակում է գտնվում։ Մեկ տարվա մեջ փակվել է 200 ռեստորան, իսկ վերջին երկու ամիսներին՝ 20-ից ավել ռեստորան։ Մյուս կողմից,ըստ Բարսեղյանի, այս բիզնեսի ոլորտում ընդգրկված մոտ 50000 աշխատողներ, ովքեր հիմնականում միջին և ցածր սոցիալական կարգավիճակ ունեն, այս որոշման պատճառով կանգնելու են ապրուստի միջոց վաստակելու լուրջ խնդրի առաջ և շատ հնարավոր է սոցաիալական պայթյուն հասունանա։ «Ինչպես կարելի է այսպես մահակ բանեցնելով՝ շատ մարդկանց շահերը վնասող նուրբ խնդիրը լուծել, որի արդյուքում ամբողջ տնտեսությունը վնաս է կրելու, սակայն դրա միակ բեռը կրողը լինելու է ռեստորանային բիզնեսը, մի բեռ, որը կարող է կործանարար լինել»,-նշեց «Ռեստորանների ասոցիացիայի» տնօրենը։ Վերջինիս համոզմամբ՝ ԱՆ-ն որոշում կայացնելիս անհրաժեշտ քննարկումներ չի անցկացրել ՊԵԿ-ի, Ֆիննախի հետ, չի հաշվարկել ռիսկերը և այլ հանգամանքներ և առաջնորդվել է միայն հանրային առողջության շահերով՝ չտալով ոչ մի երաշխիք ոլորտի անխաթար գործունեության ապահովման համար։
Միակ ճշմարիտ, արդյունավետ լուծումն այս իրավիճակում, ըստ Բարսեղյանի, հնարավոր է գտնել, եթե նախագծի շուրջ համագործակցեն Ռեստորանային ասոցիացիան, այլ ՀԿ-ներ և պետական բոլոր կառույցները՝ ԱՆ-ն, Ֆինանսների նախարարությունը,ՊԵԿ-ը և այլն։ «Սկսած հակածխախոտային, հակաալկոհոլային նախագծերի քննարկման ժամանակներից՝ մեզ հետ պետությունը խորհրդատվություն չանցկացրեց և կրկին այսպիսի խնդիրներ ծագեցին,իսկ հարկային փոփոխությունների վերաբերյալ նախագծերի ընդունման ժամանակ,պետության,այդ թվում՝վարչապետի հետ շատ հաջող քննարկումներ և համագործակցություն ստացվեց, որի արդյունքում նման թյուրըմբռնում չառաջացավ»,-ասաց Բարսեղյանը։ Հարցին՝արդյոք ասոցիացիայի կոչին միացել են մեծ թվով ռեստորաններ, սննդի,խնջույքի ու ժամանցի կետեր, մեր զրուցակիցն ասաց․Ցավոք, ես միայնակ եմ, իսկ ռեստորանները 300-ն են, չեմ կարող բոլորի անունից ասել կարճ ժամանակում, սակայն արդեն բազմաթիվ զանգեր, ահազանգեր ենք ստացել, թե ինչ է լինելու դրանից հետո, ինչ պետք է անեն և նմանատիպ շատ հարցեր»։
Նրա խոսքով՝ բոլոր օբյեկտներն էլ պատրաստվում են ընդվզելու որոշման դեմ․ ոչ մեկը դրանցից չի ստուգի այցելուների QR կոդերը։ Պետության և բիզնես ոլորտի միջև փոխզիջումային, փոխհամաձայնեցված տարբերակի հնարավորությունը Բարսեղյանը հավանական չի համարում։ Բացի այդ՝ նա կարծում է, որ ռեստորանների փոխարեն՝ տրանսպորտում և այլ մարդաշատ վայրերում թող խիստ վերահսկողություն սահմանեն։ «Վիրուսն արիստոկրատ չէ, որ միայն ռեստորաններում տարածվի»,-եզրափակեց Բարսեղյանը։
