5 գոլ, բորբոքված կրքեր, 3 կարմիր քարտ, կենտրոնական պաշտպանի՝ կրնկով գոլային փոխանցում, Ռոնալդուի 100-րդ գոլը, Ֆաբրեգասի Վերադարձն ու Մոուրինյոյի հիստերիան` «Բարսելոնա»-ն հաղթեց հերթական «կլասիկոն» և նվաճեց Իսպանիայի սուպերգավաթը:
Ի տարբերություն նախորդ հանդիպման` Պեպ Գվարդիոլան այս անգամ իր մարտական կազմն էր խաղադաշտ դուրս բերել. մեկնարկային կազմում էին Պիկեն, Չավին և Պեդրոն:
Մադրիդցիները շատ ակտիվ սկսեցին հանդիպումը, սակայն հաշիվը բացեց «Բարսելոնա»-ն. 14-րդ րոպեին աշխարհի լավագույն ֆուտբոլիստ Լիոնել Մեսսին հրաշալի փոխանցումով Կասիլիասի հետ մեն-մենակ դուրս բերեց Ինիեստային, ով գնդակը վարպետորեն նետեց Իսպանիայի հավաքականի դարպասապահի վրայով:
Տանտերերի ուրախությունը երկար չտևեց. 5 րոպե անց Քարիմ Բենզեմայի փոխանցումից հետո Կրիշտիանու Ռոնալդուն հավասարեցրեց հաշիվը` «Արքայական» ակումբի կազմում դառնալով իր 100-րդ գոլի հեղինակը:
Այդուհետ խաղը կրկին ընթանում էր հավասար պայքարում: Թիմերը գոլ խփելու մեկական հնարավորություն կորցրին: 44-րդ րոպեին կատալոնացիների կենտրոնական պաշտպան Պիկեն մրցակցի տուգանային հրապարակում կրնկով փոխանցում կատարեց Մեսսիին, ով դիպուկ հարվածով առաջ մղեց «Բարսելոնա»-ին:
Հաջորդ գոլը գրանցվեց հանդիպման 82-րդ րոպեին: Մինչ Գվարդիոլան պատրաստվում էր խաղադաշտ մտցնել Սեսկ Ֆաբրեգասին, մադրիդցիներին հաջողվեց հավասարեցնել հաշիվը: Քարիմ Բենզեման մոտ տարածությունից գրավեց Վալդեսի պաշտպանած դարպասը:
Թվում էր` խաղը կտեղափոխվի լրացուցիչ ժամանակ, սակայն 88-րդ րոպեին Ֆաբրեգաս, Ադրիանո, Մեսսի եռաքայլ կոմբինացիան ավարտվեց Կասիլիասի դարպասի գրավումով: Եզրափակողի դերում կրկին արգենտինացին էր:
Ինչպես հաճախ է լինում «կլասիկոներում»` այս խաղում նույնպես մրցավարը չկարողացավ զերծ մնալ կարմիր քարտերից. մրցավարի ավելացրած ժամանակում խաղադաշտից հեռացվեցին Օզիլն ու Մարսելոն, «Բարսելոնա»-ից կարմիր քարտի արժանացավ Դավիդ Վիլյան: Ինչպես սպասվում էր` Մոուրինյոն նույնպես անմասն չմնաց խաղադաշտում ծավալված ծեծկռտուքից:
Չափազանց գեղեցիկ ու դիտարժան խաղում «Բարսելոնա»-ն 3:2 հաշվով պարտության մատնեց «Ռեալ»-ին և նվաճեց Իսպանիայի սուպերգավաթը:
