Թուրքական Cihan լրատվական գործակալության փոխանցմամբ՝ Թուրքիայի նախագահ Աբդուլլահ Գյուլը սեպտեմբերի սկզբին Ռուսաստանի նախագահ Դմիտրի Մեդվեդևի հրավերով մեկնելու է Ռուսաստան։
Սեպտեմբերի 7-8-ին Գյուլը մասնակցելու է Մոսկվայից 250 կիլոմետր հեռավորության վրա ընկած Յարոսլավլ քաղաքում տեղի ունենալիք «Գլոբալ քաղաքական ֆորում»-ին, որին մասնակցելու է նաև Գերմանիայի կանցլեր Անգելա Մերկելը։
Երկօրյա ֆորումին մասնակցելու են աշխարհի տասնյակ երկրները ներկայացնող ավելի քան 500 բարձրաստիճան հյուրեր։ Պլանավորված է, որ ֆորումի շրջանակներում Գյուլը երկկողմանի հանդիպումներ է անցկացնելու Մեդվեդևի ու Մերկելի հետ։
Ակնկալվում է, որ Մեդվեդևի հետ հանդիպման ժամանակ Գյուլը քննարկելու է երկու երկրների փոխհարաբերությունները ռազմավարական նոր մակարդակի հասցնելու հարցը և մի շարք այլ խնդիրներ, որոնք են.
երկու երկրների միջև գործող առանց անցագրային ռեժիմի ժամկետը մեկ ամսից մինչև երկու ամսվա երկարաձգելը, Թուրքիայի միջերկրածովյան Աքքույու վայրում Ռուսաստանի կողմից կառուցվելիք թուրքական առաջին ատոմակայանին առնչվող վերջին զարգացումները, առաջիկա 5 տարիների ընթացքում երկու երկրների միջև ապրանքաշրջանառությունը 100 միլիարդ դոլարի հասցնելը, «Սամսուն-Ջեյհան» նավթամուղի կառուցմանն առնչվող խնդիրներ, ռուսական «Հարավային Հոսք» գազամուղի կառուցման վերաբերյալ Թուրքիայի թույլտվությանն առնչվող խնդիրներ, Լեռնային Ղարաբաղի հիմնախնդիրը, Իրանի միջուկային ծրագիրը, Աֆղանստանի, Իրաքի, Լիբիայի, Եգիպտոսի ու Սիրիայի վերջին զարգացումները և վերջապես «Արաբական գարնան» հետ կապված վերջին իրավիճակը։
