Հոկտեմբերի 14-ին Մարդու իրավունքների միջազգային դատարանը քննեց Հայաստանի դիմումը, որով պահանջվում է Ադրբեջանին անհապաղ ազատ արձակել գերիներին, ինչպես նաև փակել Բաքվի կենտրոնում բացված «Ռազմավարի պուրակը»։ Այս հրատապ միջոցների վերաբերյալ որոշումը կհրապարակվի դեկտեմբերի 7-ին։
Վենետիկի հանձնաժողովում Հայաստանի երկրորդ փոխարինող անդամ, միջազգային իրավունքի մասնագետ Արա Խզմալյանը «Առաջին լրատվական»-ի հետ զրույցում նշեց, որ մեր պահանջը կբավարարվի գերիների հետ կապված, իսկ ռազմավարի պուրակի մասով էլ Ադրբեջանն արդեն իսկ որոշակի շտկումներ է մտցրել, հանել է մանեկեններին:
Դիտարկմանը, որ ըստ փորձագետների, իրավական գործընթացները շատ երկար կարող են տևել և այս պայմաններում, որքանով կարող ենք ակնկալել, որ գերիների վերադարձի ականատես կլինենք, նա ասաց. «Եթե խոսքը միջազգային արդարադատության դատարանի մասին է, ապա, այո, իրավական գործընթացը տարիներ է տևելու, սակայն կա ողջամիտ տրամաբանություն, որ կարող է դատարանը միջանկյալ միջոց կիրառել, թեև չկա միանշանակ երաշխիք, որ հենց այդ որոշումը կկայացնի: Մեզ համար հիմքը մեր պահանջի հիմնավորված լինելն է, դա է վստահություն տալիս հայկական կողմին»:
Հարցին, թե դատարանի կողմից մեր պահանջի բավարարման դեպքում ինչ գործընթացներ են ենթադրվում, Արա Խզմալյանը պատասխանեց. «Ենթադրում են գերիների վերադարձի կազմակերպում»:
Իսկ հնարավո՞ր է, որ Ադրբեջանը հրաժարվի կատարել դատարանի որոշումը, հարցին էլ արձագանքեց. «Այդ դեպքում Ադրբեջանը շատ լուրջ խնդիրների առջև կարող է կանգնել, մասնավորապես, ՄԱԿ-ի Անվտանգության խորհրդի կողմից: Սա Մարդու իրավունքների եվրոպական դատարանը չէ, որ անտեսեն որոշման կայացումը և անցնի գնա: Այս դեպքում պարտադրանքի իրական մեխանիզմներ կան և միանշանակ չէ, որ որևէ պետություն կարող է իրեն թույլ տալ չկատարել միջազգային դատարանի որոշումը»: