Հայաստանի և Բելառուսի ղեկավարները քննարկել են «խնդրահարույց հարցերը ՀԱՊԿ-ում», հաղորդում է պաշտոնական Մինսկը։
«Ալեքսանդր Լուկաշենկոն հեռախոսազրույց է ունեցել Հայաստանի վարչապետ Նիկոլ Փաշինյանի հետ։ Կողմերը միմյանց ներկայացրել են Բելառուսում և Հայաստանում տիրող իրավիճակը, քննարկել խնդրահարույց հարցերը ՀԱՊԿ շրջանակներում», – նշում է Բելառուսի նախագահական նստավայրը։
Ըստ պաշտոնական Մինսկի, Փաշինյանը Լուկաշենկոյին տեղեկացրել է հայ-ադրբեջանական սահմանին տիրող իրավիճակի և դրա զարգացման հնարավոր ուղիների մասին։
Պաշտոնական Երևանի փոխանցմամբ, Փաշինյանն ու Լուկաշենկոն տեղեկատվություն են փոխանակել իրենց երկրներում և տարածաշրջաններում տեղի ունեցող զարգացումների վերաբերյալ։ Հայաստանի վարչապետն անդրադարձել է հայ-ադրբեջանական սահմանին ստեղծված իրավիճակին։
Քաղաքագետ Ռուբեն Մեհրաբյանը նշում է, որ թեպետ մեն դատողություններ կարող ենք անել ելնելով բացառապես մամլո հաղորդագրությունից, այդուհանդերձ այդ խոսակցությունը կարևոր է, որ գոնե ինչ-որ ձևով զսպվի Լուկաշենկոյի պրոալիևական գործունեությունը․«Այդ իմաստով ես կարծում եմ, որ այո՛, որոշակի բարոյական խոչընդոտներ կստեղծվեն Լուկաշենկոյի համար՝ նման գործունեությունը շարունակելու առումով։ Մյուս կողմից էլ, Լուկաշենկոն ուր, բարոյականությունն՝ ուր։ Երկրորդ՝ Լուկաշենկոյի քաղաքականությունը պրոադրբեջանական չէ, պրոալիևական է, պրոբռնապետական, հակադեմոկրատական, իսկ մնացածը՝ այդ ամենի ածանցյալն է»,-«Առաջին լրատվական»-ի հետ զրույցում ասաց նա։
Խոսելով ՀԱՊԿ-ի գործունեության, սահմանային վերջին էսկալացիայի ժամանակ այդ կազմակերպության սնանկ վարքագծի մասին, մեր զրուցակիցն ասաց․«Պարզ է, որ այդ կազմակերպությունն անիմաստ թեփ է, որի արժեքը նույնիսկ երկու ռուսական կոպեկ չարժի։ Բայց այն, որ Լուկաշենկոյին պետք է ինչ-որ ձևով զգուշացնել, հորդորել չանել նման բաներ՝ ես կարծում եմ, որ դրա որոշակի անհրաժեշտությունը կա»։
Փաստորեն մեր դիվանագիտությունը «նեղանալու» փոխարեն նախընտրում է աշխատանք տանել, դիտարկմանն ի պատասխան, Ռուբեն Մեհրաբյանն ասաց․«Իհարկե։ Ի վերջո մենք այնտեղ դեսպանատություն ունենք։ Դեսպանություն, որը գլխավորում է մեր շատ փորձառու դիվանագետ Ռազմիկ Խումարյանը։ Այո՛, նա էլ անելիք ունի, ՀՀ ղեկավարությունն էլ անելիք ունի, այս կոմունիկացիան պահել է պետք։ Չեմ կարծում, որ դրանից մեզ մեծ օգուտներ կլինեն, բայց դա կարևոր է, որպեսզի մեզ մեծ վնասներ չլինեն»։
Մեր հաջորդ դիտարկմանը, թե Հայաստանը նաև իր համար պետք է հստակեցնի, որ ՀԱՊԿ-ի աջակցությանը չպետք է ապավինի, քաղաքագետը նշեց․«Երբ ենք ունեցել, որ հիմա էլ ունենանք։ Ով ասում է, որ ՀԱՊԿ-ից մենք օգնություն պետք է ունենանք կա՛մ ավարտուն ապուշ է, կա՛մ ավարտուն ստահակ՝ երկուսից մեկը, կամ երկուսը միասին»։