Ադրբեջանական APA լրատվական գործակալության փոխանցմամբ՝ ՄԱԿ-ի գլխավոր քարտուղարին, ԵԱՀԿ Մինսկի խմբի համանախագահող երկրներ ԱՄՆ-ի, Ֆրանսիայի ու Ռուսաստանի նախագահներին ադրբեջանական կողմի ուղարկած «ղարաբաղյան» նամակին գրավոր պատասխանել է Ադրբեջանում ԱՄՆ դեսպան Մեթյու Բրայզան.
«Խաղաղ ճանապարհող ղարաբաղյան հակամարտության կարգավորումն առաջնահերթ է համարվում ԱՄՆ նախագահ Բարաք Օբամայի ու պետքարտուղար Հիլարի Քլինթոնի համար։ Այդ պատճառով էլ նույնը վերաբերում է ինձ՝ Ադրբեջանում ԱՄՆ դեսպանիս։
Խաղաղ ճանապարհով ղարաբաղյան հակամարտության կարգավորումը կնպաստի Ադրբեջանի և ողջ Հարավային Կովկասի զարգացմանը և տարածաշրջանի կայունությանը։ Ես՝ որպես դեսպան, անում եմ հնարավորը և օգնում եմ Մինսկի խմբի համանախագահներին ու հակամարտող կողմերին՝ ռազմական գործողությունների վերսկսումը կանխելու և բանակցությունների միջոցով արդար ու տևական խաղաղություն հաստատելու համար»։
Հիշեցնենք, որ երեկ ՄԱԿ-ում Ադրբեջանի մշտական ներկայացուցիչ Ագշին Մեխտիևը նամակ է հղել ՄԱԿ-ի գլխավոր քարտուղար Բան Գի Մունին, որում ուշադրություն է հրավիրել «Հայաստանի Հանրապետության զինված ուժերի կողմից հրադադարի ռեժիմի խախտման» շարունակության վրա։
Նամակում ընդգծվել է, որ հուլիսին գրանցված «հրադադարի ռեժիմի խախտումների» ու հուլիսի 14-ի «ահաբեկչության» արդյունքում զոհվել է 13-ամյա ադրբեջանցի մի աղջնակ և Ադրբեջանի զինված ուժերի մի սպա, իսկ Ադրբեջանի երկու քաղաքացիներ էլ լուրջ վնասվածքներ են ստացել։