Թուրքական Radikal թերթի փոխանցմամբ՝ Իսրայելի վարչապետ Բենիամին Նեթանյահուն մերժել է «Մավի Մարմարա»-ի միջադեպի կապակցությամբ Թուրքիայից ներողություն խնդրելու վերաբերյալ ԱՄՆ պետքարտուղար Հիլարի Քլինթոնի առաջարկը։
Նեթանյահուն հայտնել է, որ Իսրայելը դեռ չի պլանավորել ներողություն խնդրել Թուրքիայից։ Իսրայելական Haaretz թերթի տվյալներով՝ երեքշաբթի օրը Քլինթոնը հեռախոսազրույց էր ունեցել Նեթանյահուի հետ, որի ընթացքում պահանջել էր, որ Իսրայելը ներողություն խնդրի Թուրքիայից, ինչը կնպաստի թուրք-իսրայելական հարաբերությունների կարգավորմանը։
Հիշեցնենք, որ 2010 թվականի մայիսի 31-ի գիշերը Իսրայելի ռազմածովային ուժերը հարձակում գործեցին «Մեր ուղեգիծը Պաղեստինն է, իսկ բեռը՝ մարդասիրական օգնություն» կարգախոսով, վեց նավից բաղկացած «Ազատության նավատորմի» վրա, որը 10 տոննա հումանիտար օգնություն էր տանում Գազա:
Հարձակման հետևանքով 16 մարդ սպանվեց, մոտ 30-ը՝ վիրավորվեց: Զոհվածների թվում էին Թուրքիայի 9 պաղեստինամետ քաղաքացիներ: Իսրայելը վստահեցնում էր, որ 6 նավերով Գազայի հատված ուղևորվող շուրջ 700 ակտիվիստները նաև զենք են կրել:
Թուրքիայի արտգործնախարար Ահմեդ Դավութօղլուն դա որակեց որպես «թուրքական սեպտեմբերի 11»` միջազգային հանրության ուշադրությունը հրավիրելով այն բանի վրա, որ իրենց քաղաքացիները սպանվել են այլ երկրի կանոնավոր բանակի կողմից, իսկ Թուրքիայի վարչապետ Էրդողանը հայտարարեց, որ Իսրայելը զբաղվում է «ծովահենությամբ»։
Դրանից հետո թուրքական կողմն Իսրայելից շարունակ պահանջում է ներողություն խնդրել և փոխհատուցում վճարել տուժածների ընտանիքներին, ինչը, ըստ իսրայելական կողմի, նշանակում էր հանձնվել ահաբեկչությանը:
