«Հայաստանը պետք մի քանի կոնկրետ հարցեր լուծի՝ ստեղծի կայունացնող հիմնադրամ, ազատ թողնի տրանսֆերտավորված դոլարը, որ կճնշի շուկան»,- այսօր լրագորղների հետ հանդիպման ժամանակ հայտնեց ՀՀ նախկին վարչապետ Հրանտ Բագրատյանը՝ ավելացնելով, որ համաշխարհային տնտեսության հետագա զարգացումը լինելու է անընդհատ տատանվող, թռչկոտող սեսիայի մեջ: Այս պայմաններում բոլորը ստեղծում են կայունացնող հիանդրամներ:
«Մեր ասելուց հետո, այստեղ են ասել՝ խելքներին նայեք, բռնեցին, ռուսական վարկից ստեղծեցին կայունացնող հիմնադրամ: Փող, որը վերցված է 8-9%-ով: Եկամուտ չկա, բայց երկիրը չի կարող չունենալ կայունացնող հիմնադրամ»,- ասաց Հ. Բագրատյանը:
Նրա խոսքերով՝ չի կարելի հանդուրժել բանկերի «գերլիկվիդային վիճակը». երբ երկրի տնտեսությունը 10%-ով իջնում է, բանկերի շահույթն ավելանում է: Այսինքն, սխալ է կառավարման համակարգը, բանկերը ռիսկերը չեն կիսել արդյունաբերության հետ:
«Սա կարևոր խնդիր է, բայց ես չեմ պատկերացնում այս հարցի լուծումը գործող կառավարության, գործող վարչապետի, գործող ԿԲ նախագահի պայմաններում, որովհետև առնվազն պետք են մարդիկ, որ սա հասկանում են»,- ընդգծեց Հ. Բագրատյանը:
Նրա կարծիքով՝ ԿԲ-ն պետք է անընդհատ գնի դոլար, որը կբերի դրամի որոշակի արժեզրկման, դրա հետևանքով առաջացող գնաճը պետք է զսպել՝ սրելով մրցակցությունը, վերացնելով մենաշնորհները. «Սա ուրիշ Հայաստան է, նոր Հայաստան, 100%-ով նոր տնտեսական քաղաքականություն: Սրան պատրաստ չէ ո՛չ միայն կառավարությունը, այլ նաև նախագահը: Սա նրանց պատկերացումից դուրս է»:
Հ. Բագրատյանը նկատեց, որ այսօր իշխանությունները տնտեսական քաղաքականությունից 4 բառ են յուրացրել՝ թիրախ, դիվերսիֆիկացիա, կայուն զարգացում, տեսլական: Բանախոսը գտնում է, որ այս բառերը պետք է արգելել հայոց լեզվի մեջ. «Տեսնեմ դրանից հետո կառավարությունն ի՞նչ է խոսելու»:
Հ. Բագրատյանը նշեց նաև, որ ՀՀ-ում դոլարային գներն ավելի բարձր են, քան եվրոպական մայրաքաղաքներում: Ըստ նրա՝ զարմանալի չի լինի, եթե Հայաստանում բենզինը 470-ից միանգամից դառնա 370 դրամ-լիտր: «Նավթը 100 դոլարից իջել է 80-ի, ինչո՞ւ բենզինը 1 դրամ չիջավ»,- հարցադրում արեց Հ. Բագրատյանը՝ շեշտելով, որ դա հնարավոր է մրցակցության շնորհիվ:
Անդրադառնալով հանքարդյունաբերությանը՝ Հ. Բագրատյանը նշեց, որ Ազգային ժողովը պետք է ամեն տարի սահմանի հանքի գին, որպեսզի հարկերը մուծվեն ըստ արդյունահանման: Ընդ որում, երկրի ՀՆԱ-ն էլ պետք է տրվի առանց հանքարդյունաբերության ցուցանիշների: Օրինակ կարելի է վերցնել Ադրբեջանից, որը ՀՆԱ-ի մեջ չի ներառում նավթը:
Հ. Բագրատյանի հաշվարկներով՝ եթե ՀՀ ՀՆԱ-ից հանվեն հանքարդյունաբերության ցուցանիշները, ապա 6 ամսվա տվյալներով 2% անկում է եղել: Իսկ եթե ըստ պատշաճի հարկվի հանքարդյունաբերությունը, ապա 750-ից 1 մլրդ դոլար ավելի կմտնի բյուջե: «Այսօր այդ 1 մլրդը յուրացվում է»,- հայտարարեց Հ. Բագրատյանը:
